İsrailin Müdafiə naziri İsrail Kats bazar ertəsi günü bəyan edib ki, “Hizbullah” qruplaşmasının baş katibi Naim Qasım “odla oynayır” və bu od həm təşkilatı, həm də bütün Livanı yandıracaq. Bu barədə məlumat Müdafiə Nazirliyinin ofisindən verilib. Katsın bu xəbərdarlığı Naim Qasımın iki ölkə arasında birbaşa danışıqları rədd etməsi və İsrail hücumlarına qarşı cavab əməliyyatlarını davam etdirəcəyi ilə bağlı təhdidlərindən sonra səslənib.
ArabAZ xəbər verir ki, BMT-nin Livandakı xüsusi koordinatoru Janin Hennis-Plassxaert ilə görüşən Kats bildirib ki, “Naim Qasım odla oynayır və bu od Hizbullahı, eləcə də bütün Livanı yandıracaq… Əgər Livan hökuməti terrorçu “Hizbullah” təşkilatının qanadı altında gizlənməyə davam edərsə, alov daha da güclənəcək və Livanın sidr ağaclarını (rəmzini) külə döndərəcək”. Nazir həmçinin əlavə edib ki, Livanın şimalındakı Qaliley qəsəbələrinə və İsrail qüvvələrinə atəş açıldığı müddətcə atəşkəs reallığı mümkün olmayacaq.
Daha çox hərbi əməliyyat ehtiyacı
İsrailin Baş naziri Benyamin Netanyahu da bazar ertəsi verdiyi açıqlamada “Hizbullah”ın raket və PUA hücumlarının daha çox hərbi fəaliyyət tələb etdiyini vurğulayıb. Netanyahu qeyd edib ki, xüsusilə 122 mm-lik raketlər və dronlar mərkəzi təhdid təşkil edir və bu, operativ və texniki tədbirlərin birləşdirilməsini zəruri edir.
Livan daxilində fikir ayrılığı
Xatırladaq ki, “Hizbullah” lideri Naim Qasım Livan hakimiyyətinin İsrail ilə birbaşa danışıqlar aparmasını “böyük günah” adlandırıb və bunun ölkəni qeyri-sabitlik burulğanına salacağı barədə xəbərdarlıq edib. Buna cavab olaraq Livan Prezidenti Jozef Aun danışıqların məqsədinin müharibəni dayandırmaq olduğunu bildirib və Livanı bu müharibəyə sürükləyənləri (ad çəkmədən “Hizbullah”ı nəzərdə tutaraq) “xəyanətdə” ittiham edib.
Martın 2-də başlayan son müharibədən sonra Livan və İsrail səfirləri Vaşinqtonda son onilliklərdə ilk dəfə birbaşa təmaslar qurublar. Livan tərəfi ABŞ-ın vasitəçiliyi ilə aparılan bu danışıqlarda əsas məqsədin müharibənin dayandırılması, İsrailin ölkənin cənubundan çıxması və bir milyondan çox köçkünün öz yurduna qayıtması olduğunu bəyan edir. Lakin “sarı xətt” kimi tanınan sərhəd bölgələrində İsrailin dağıdıcı əməliyyatları və “Hizbullah”ın cavab hücumları atəşkəs razılaşmasını kövrək saxlayır.
