Misir Prezidenti Əbdülfəttah əl-Sisi cümə axşamı Sina yarımadasının azad edilməsinin 44-cü ildönümü münasibətilə Naməlum Əsgər Memorialını və sabiq prezident Ənvər Sadatın məzarını ziyarət edərək əklil qoyub.
ArabAZ xəbər verir ki, mərasimdə ölkənin müdafiə naziri, ordu general-leytenantı Məhəmməd Zəki və Misir Silahlı Qüvvələrinin Baş Qərargah rəisi, general-leytenant Usamə Əskər də iştirak ediblər. Prezident əl-Sisi vətənin müdafiəsi naminə canlarından keçən Misir şəhidlərinin ruhuna ehtiram olaraq hərbi orkestrin ifasında şəhidlər marşını dinləyib.
Daha sonra dövlət başçısı 1973-cü il oktyabr müharibəsinin qəhrəmanı və 1979-cu ildə İsraillə sülh müqaviləsini imzalayaraq Sinanın geri qaytarılmasının yolunu açan sabiq prezident Ənvər Sadatın məzarı önünə əklil qoyub və onun ailə üzvləri ilə salamlaşıb.
Bu əlamətdar gün münasibətilə xalqa müraciət edən prezident əl-Sisi bildirib ki, Sina yarımadasının azad edilməsi Misir xalqının əyilməz iradəsinin və ordusunun fədakarlığının simvoludur. O vurğulayıb ki, Misir öz torpaqlarının hər bir qarışını qorumağa qadirdir və ölkənin milli təhlükəsizliyi hər şeydən üstündür.
Qeyd edək ki, Sina yarımadasının azad edilməsi günü hər il aprelin 25-də qeyd olunur. Bu tarix 1982-ci ildə İsrail qoşunlarının 1967-ci ildə işğal olunmuş Sina yarımadasından tamamilə çıxarılmasını və Misirin öz suverenliyini bərpa etməsini tərənnüm edir.
