BAKI,AzerVoice
Argentina millisinin və dünya futbolunun əfsanəsi Lionel Messi, sabiq klubu Barselonanı La Liqada qazandığı 28-ci çempionluq münasibətilə təbrik edib.
AzerVoice xəbər verir ki, Kataloniya klubu ötən axşam Espanyol üzərində qazandığı 2:0 hesablı qələbə ilə mövsümü zirvədə tamamlayaraq çempionluğunu rəsmiləşdirib.
Messi 2021-ci ildə Barselonadan ayrıldıqdan sonra klub heç vaxt bu qədər sabit və məhsuldar oyun sərgiləməyib.
Hansi Flikin rəhbərlik etdiyi komanda cari mövsümdə La Liqada 97 qol vuraraq, Messi dövründən sonra ən yaxşı performansını nümayiş etdirib və bunun nəticəsində 28-ci çempionluq titulunu əldə edib.
Messinin Barselona ilə münasibətləri 2021-ci ildəki dramatik ayrılıqdan sonra soyuqlaşıb.
Klub prezidenti Joan Laportanın verdiyi müqavilə vədlərinin yerinə yetirilməməsi argentinalı ulduzu məyus edib. Azarkeşlər uzun illər Messi tərəfindən keçmiş klubuna rəsmi təbriklər görmədiklərini qeyd etsələr də, bu dəfə o, İnstaqram hesabında qısa, lakin simvolik bir paylaşım edib: “Təbriklər!”
Messinin bu jesti azarkeşlər tərəfindən böyük məmnunluqla qarşılanıb və onun “evə dönüşü” mövzusunu bir daha gündəmə gətirib.
