BAKI, AzerVoice , Fərid Mikayılov
İngiltərə Premyer Liqasının Tottenham Hotspur klubunda çıxış edən cənubi koreyalı ulduz futbolçu Heung-Min Son, komandadan ayrılmaq qərarı verdiyini bəyan edib.
AzerVoice xəbər verir ki, o, bu barədə Nyukasl Yunayted ilə keçiriləcək yoldaşlıq oyunu öncəsi təşkil edilən mətbuat konfransında məlumat verib.
Son açıqlamasında bu qərarın onun karyerasında verdiyi ən çətin addımlardan biri olduğunu bildirib:
“Bir az dəyişiklik istəyirəm. 10 il uzun müddətdir. Kluba 23 yaşımda, çox gənc yaşda qatıldım. Bu klubdan artıq yetkin, qürurlu bir insan kimi ayrılıram,” – deyə o vurğulayıb.
Futbolçu həmçinin Tottenham azarkeşlərinin ona göstərdiyi sevgi və dəstəyə görə təşəkkürünü bildirib.
“Azarkeşlərin sevgisini hər zaman hiss etdim. Ümid edirəm ki, bu ayrılıq üçün doğru zamandır və bu qərarıma anlayışla yanaşılacaq” – deyə Son qeyd edib.
Qeyd edək ki, Heung-Min Son 2015-ci ildə Almaniyanın Bayer Leverkusen klubundan Tottenhama transfer olunmuşdu. Klubdakı 10 illik karyerası ərzində o, 300-dən çox oyuna çıxaraq Premyer Liqanın ən nüfuzlu hücumçularından birinə çevrilib. O, 2024/25 mövsümündə klubla UEFA Avropa Liqasının qalibi olub.
