BAKI, AzerVoice, Nailə Babazadə
UEFA Çempionlar Liqasının IV turunda Azərbaycan təmsilçisi “Qarabağ” doğma meydanda İngiltərənin “Çelsi” klubunu qəbul edəcək. Görüş bu gün Tofiq Bəhramov adına Respublika Stadionunda keçiriləcək.
AzerVoice xəbər verir ki, komandaların əvvəlki qarşılaşmaları 2017/18 mövsümündə olub – London “Çelsi”də 6:0, Bakıda isə 4:0 hesabı ilə qələbə qazanmışdı. “Qarabağ” ümumilikdə İngiltərə komandalarına qarşı keçirdiyi 7 oyunun hamısında uduzub, son 6 oyununda qol vura bilməyib.
“Qarabağ” bu mövsüm Çempionlar Liqasının əsas mərhələsində ilk qələbələrini əldə edib: səfərdə Benfika 3:2, evdə Kopenhagen 2:0. Komanda son 6 oyunda 16 qol vurub, Leandro Andrade isə son 6 Avropa oyunundan 4-də fərqlənib.
“Çelsi” isə bu mövsüm qrup mərhələsində son 16 Avropa oyunundan 14-də qələbə qazanıb, ardıcıl 18 oyunda qol vurub və Avropa kubokları tarixində 349 qol əldə edib. Son oyunda “Ayaks”ı 5:1 məğlub edərək turnirdə 200-cü oyununu qeyd edib.
Matç hər iki komanda üçün vacibdir – “Qarabağ” qrupdakı mövqeyini bərpa etmək, “Çelsi” isə növbəti mərhələyə vəsiqəni təmin etmək istəyir.
