BAKI,AzerVoice, Fərid Mikayılov
Özbəkistanın paytaxtı Daşkənd şəhərində Asiya Olimpiya Şurasının (AOŞ) 46-cı Baş Assambleyası keçirilib.
AzerVoice xəbər verir ki, iclasda təşkilati məsələlərlə yanaşı, Asiya qitəsinin ən böyük idman qurumlarından biri olan Asiya Olimpiya Şurasının yeni rəhbərinin seçilməsi məsələsinə baxılıb.
Səsvermə nəticəsində Milli Olimpiya Komitələri Assosiasiyasının (ANOC) sədrinin birinci müavini, Qətər Dövlətinin Olimpiya Komitəsinin prezidenti Şeyx Coaan bin Həməd Al Tani Asiya Olimpiya Şurasının yeni rəhbəri seçilib. Onun namizədliyi iştirakçılar tərəfindən yekdilliklə dəstəklənib.
Daşkənddə keçirilən 46-cı Baş Assambleyanın işində Özbəkistan Prezidenti Şavkat Mirziyoyev də iştirak edib. Tədbirə, həmçinin, beynəlxalq idman təşkilatlarının rəhbərləri və yüksək səviyyəli rəsmi şəxslər qatılıblar.
İştirakçılar arasında Dünya Antidopinq Agentliyinin prezidenti Vitold Banka, Beynəlxalq Gimnastika Federasiyasının prezidenti Morinari Vatanabe, Beynəlxalq Ağırlıqqaldırma Federasiyasının prezidenti Məhəmməd Jalud, “World Boxing” təşkilatının prezidenti Gennadi Qolovkin, Beynəlxalq Çimərlik Hokkeyi Federasiyasının prezidenti Məhəmməd Təyab İkram, Asiya Paralimpiya Komitəsinin prezidenti Macid Rəşid, Beynəlxalq Sambo Federasiyasının prezidenti Vasili Şestakov, ANOC-un baş katibi Gunilla Lindberq, Afrika Olimpiya Komitələri Assosiasiyasının prezidenti Mustafa Bərrəf və digər nüfuzlu qonaqlar yer alıblar.
Eyni zamanda ABŞ Prezidentinin xüsusi nümayəndəsi Paolo Zampolli, Rusiya Federasiyasının idman naziri Mixail Deqtyaryov, Səudiyyə Ərəbistanının idman naziri Əbdüləziz bin Turki Al Səud, Qətər Dövlətinin gənclər və idman naziri Şeyx Həməd bin Xəlifə Al Tani də tədbirdə iştirak ediblər.
Qeyd edək ki, Asiya Olimpiya Şurası Asiya qitəsində olimpiya hərəkatının inkişafı və iri beynəlxalq idman yarışlarının koordinasiyasında əsas rol oynayan qurumlardan biridir.
