Qətər İranın Rəs Laffan qaz obyektinə martın 18-də baş vermiş hücumun qeydə alınmadığı barədə iddialarını rədd edib. Doha bildirib ki, Tehranın istinad etdiyi sənəd tam faktlar toplusunu əks etdirmir və hücumlarla bağlı BMT-yə təqdim edilən rəsmi məlumatları əvəz edə bilməz.

ArabAZ xəbər verir ki, Qətər Xarici İşlər Nazirliyinin sözçüsü Macid əl-Ənsari İranın iddialarına cavab olaraq bildirib ki, Doha öz ərazisinə edilən hücumları dəfələrlə BMT-yə təqdim etdiyi rəsmi məktublarla sənədləşdirib.

Əl-Ənsari qeyd edib ki, martın 1-də təqdim olunan məktubda mülki, kommersiya və yaşayış ərazilərinə əvvəlki raket hücumları, nəticədə 16 nəfərin yaralanması barədə məlumat verilib.

Onun sözlərinə görə, martın 18-də Rəs Laffan qaz obyektinə edilən hücum isə ayrıca S/2026/207 nömrəli məktubla BMT-də qeydə alınıb.

Qətər rəsmisi bildirib ki, iyulun 20-də təqdim olunan sənəddə isə daha üç nəfərin, o cümlədən bir uşağın yaralanması ilə nəticələnən yeni hücumlar əks olunub.

Əl-Ənsari İranın istinad etdiyi sənədin Beynəlxalq Telekommunikasiya İttifaqının səlahiyyətli konfransı üçün hazırlanmış “təhlükəsizlik və risk qiymətləndirilməsi” sənədi olduğunu bildirib.

O vurğulayıb ki, həmin sənəd hadisələrin tam hüquqi və faktoloji qiymətləndirilməsi deyil və bütövlükdə nəzərdən keçirildikdə Qətər ərazisində, o cümlədən martın 18-də Rəs Laffan qaz obyektlərinə qarşı hücumların baş verdiyini təsdiqləyir.

Qətər Xarici İşlər Nazirliyinin sözçüsü bildirib ki, raket və pilotsuz uçuş aparatlarının qarşısının alınması bu hücumların ciddiliyini azaltmır və məsul şəxsləri məsuliyyətdən azad etmir.

O əlavə edib ki, Qətər bu münaqişənin tərəfi deyil və gərginliyin azaldılması üçün diplomatik kanallar vasitəsilə fəaliyyətini davam etdirəcək.