Bakı. AzerVoice

Zəngəzur dəhlizinin açılması yükdaşıma xərclərini azalda artıra bilər.

AzerVoice xəbər verir ki, bunu jurnalistlərə açıqlamasında Azərbaycan Beynəlxalq Avtomobil Daşıyıcıları Assosiasiyasının (ABADA) baş katibi Kənan Qurbanov deyib.

ABADA-nın baş katibi Zəngəzur dəhlizinin perspektivlərindən də bəhs edib:

"Zəngəzur dəhlizi dünya əhəmiyyətli bir mövzudur. Biz hamımız səbrsizliklə onun açılmasını gözləyirik. Hazırda bizim daşımalarımız Avropaya ya Gürcüstan, ya da İran ərazisindən keçməklə daşınır. Bu da öz növbəsində həm zamanı, həm də xərcləri artırır. Lakin Zəngəzur dəhlizi açılanda yol qısalacaq və Azərbaycan öz ərazisindən daşımalar aparacaq.

Ümumilikdə, Zəngəzur dəhlizinin açılması yükdaşıma xərclərini azalda, bu dəhlizə cəlbediciliyi artıra bilər".

Azərbaycan Beynəlxalq Avtomobil Daşıyıcıları Assosiasiyası (ABADA) olaraq hədəfimiz ilin axırınadək Karnet kitabçasında buraxılışı olan böyük şirkətlərin sayının 100-ü ötməsidir.

O bildirib ki, artıq 85 şirkət bu kitabçada üzvdür:

"Məqsədimiz bütün daşıyıcılarımızı Karnet kitabçasına cəlb etməkdir. Bu kitabçaya cəlb etmək onların keyfiyyətinin artırılması deməkdir.

Həmçinin, daşıyıcı üzv şirkətlərin coğrafiyasının genişləndirilməsi də əsas hədəflərimizdəndir. Bu genişləndirilmə Çinə qədər uzandı. Hazırkı hədəfimiz Avropanın dərinliyinə yükdaşımaların coğrafiyasını artırmaqdır".

K.Qurbanov qeyd edib ki, İranın dərinliyinə daşıyıcıların daxil olmasında çətinliklər yaşanır:

"Çünki orada cərimələr, süni maneələr çoxdur. Məqsədimiz oraya da yükdaşımaların coğrafiyasını genişləndirməkdir".