İraqın Federal Dürüstlük Komissiyası və ixtisaslaşmış məhkəmə nəzarəti qurumları dövlət bankları sektorunda geniş maliyyə auditi və araşdırmaya başlayıb.

ArabAZ xəbər veri ki, sentyabrın 5-də başladılan araşdırma likvidliyin azalması, böyük məbləğli kommersiya kreditləri və maliyyələşdirmə üzrə xüsusi güzəştlərin verilməsi məsələlərini əhatə edir.

Araşdırmanın mərkəzində ölkənin iki əsas dövlət bankı — Rəfidəyn Bank və Rəşid Bank dayanır. İstintaq orqanları qeyri-standart prosedurlar və ya müstəsna güzəştlər əsasında verilmiş, məbləği 1 milyard İraq dinarını (təxminən 763 min ABŞ dolları) keçən kreditləri araşdırır.

Nəzarət orqanlarına yaxın mənbələrin məlumatına görə, maliyyə ekspertləri kredit sənədlərini İraq Mərkəzi Bankının qanunvericiliklə müəyyən edilmiş kreditləşmə qaydaları ilə müqayisə edərək mümkün mülki və inzibati məsuliyyəti müəyyənləşdirirlər.

Araşdırma çərçivəsində 1 milyard İraq dinarı və daha yüksək məbləğdə kredit və investisiya maliyyələşdirməsi paketlərinin verilməsi, kredit tələblərinə və girov təminatına riayət olunması yoxlanılır.

Həmçinin xüsusi güzəştlər əldə etmiş şirkətlərin strukturları və mümkün siyasi əlaqələri araşdırılır. Vəsaitlərin real kommersiya aktivlərinə yönəldilib-yönəldilmədiyi və ya spekulyativ pul vəsaitinə çevrilib-çevrilmədiyi müəyyənləşdirilir.

Bir sıra araşdırılan işlərin əvvəlki hökumət və Maliyyə Nazirliyinin rəhbərliyi dövründə qəbul edilmiş siyasət və inzibati qərarlarla bağlı olduğu bildirilir.

Bundan əlavə, avqustun sonlarında bəzi bank idarə heyətlərinin dövlət qulluqçularının əməkhaqqı ödənişlərində gecikmələr fonunda hökumətin yüksək vəzifəli şəxslərinə bankların likvidlik vəziyyəti barədə qeyri-dəqiq və ya yanıltıcı məlumat təqdim etməsi ilə bağlı xəbərlər də araşdırılır.

Araşdırmanın İraq xəzinəsində artan likvidlik problemləri fonunda aparıldığı qeyd olunur. Ölkədə dövlət sektorunda əməkhaqqı və sosial rifah xərcləri aylıq orta hesabla 7,4 trilyon İraq dinarını ötür.

Hakimiyyət dövlət banklarının balans hesabatlarını yoxlamaqla dövlət vəsaitlərinin qorunmasını, əmanətçilərin kapitalının təhlükəsizliyini və dövlət kommersiya qurumlarında maliyyə intizamının bərpasını hədəfləyir.

Nəzarət qurumları bildiriblər ki, araşdırmalar başa çatdıqdan sonra məsul şəxslər və qaydalara zidd şəkildə kredit götürən şəxslərlə bağlı materiallar müvafiq Dürüstlük üzrə İstintaq Məhkəmələrinə təqdim ediləcək. Zərurət yarandığı halda əmlakın dondurulması, ölkədən çıxış qadağası və həbs qərarlarının çıxarılması üçün hüquqi prosedurlar başladılacaq.