İordaniyanın Turizm və Qədim Əsərlər Nazirliyi ölkədaxili turizmi təşviq edən "Urdunna Jannah" proqramının başladığı gündən 31 avqust tarixinədək təxminən 181 000 iştirakçı topladığını açıqlayıb. Vətəndaşlar çoxsaylı turoperatorlar, bələdçilər və turizm nəqliyyat şirkətlərinin dəstəyi ilə Krallığın müxtəlif vilayətlərinə təşkil olunan turlara qatılıblar.
ArabAZ xəbər verir ki, nazirlik bildirib ki, avqust ayında gecələməli səfərlər üzrə liderliyi Petra, Vadi Rum və Əqəbədən ibarət "Qızıl Üçbucaq" qoruyub saxlayıb. Bununla yanaşı, proqrama yeni daxil edilmiş İraq əl-Əmir, Ümm ər-Rəsas və Rihab kimi istiqamətlərə də maraq artıb. Layihənin əsas məqsədi subsidiyalaşdırılmış sərfəli paketlər vasitəsilə daxili turizmi canlandırmaq və vətəndaşları yerli tarixi-mədəni məkanları kəşf etməyə təşviq etməkdir.
Proqram 2026-cı ildə təxminən 220 000 benefisiara xidmət göstərməyi hədəfləyir. Əsas diqqət az ziyarət edilən bölgələrə axını təmin etməyə və regional geosiyasi hadisələrdən ən çox zərər çəkən ərazilərə, xüsusən də Petraya dəstək verməyə yönəlib. Nazirlik səfər xərclərinin 60 faizədək hissəsini subsidiyalaşdırır. Layihə çərçivəsində 400-dən çox yerli müəssisənin — restoranlar, otellər və turizm layihələrinin cəlb olunması, həmçinin İordaniya üzrə 60-dan çox fərqli marşrutun təqdim edilməsi planlaşdırılır.
Yenilənmiş proqram rəqəmsal platforma vasitəsilə birbaşa rezervasiya və şəxsi avtomobillə endirimli səyahət imkanı yaradır. Həmçinin proqramdan faydalanmaq hüququ olan şəxslərin dairəsi genişləndirilib: bura İordaniyada təhsil alan əcnəbi və ərəb tələbələr, Qəzza zolağı sakinləri, eləcə də iordaniyalı qadınların qeyri-iordaniyalı həyat yoldaşları və övladları da daxil edilib.
Səyahət agentlikləri, bələdçilər, otellər, düşərgələr, nəqliyyat şirkətləri və xalq sənətkarlığı dükanları ilə tərəfdaşlıq şəraitində icra edilən bu təşəbbüs regional böhran fonunda turizm sektorunun dayanıqlığını təmin etmək və yerli icmaları gücləndirmək məqsədi daşıyır. Təklif olunan tur paketlərinə müasir avtobuslarla ödənişsiz nəqliyyat, bələdçi müşayiəti və yeməklər daxildir; eyni zamanda hər bir vilayətdə aylıq mədəni tədbirlər və yerli yarmarkalar təşkil edilir.
