Məkkədəki Hira Mədəniyyət məhəlləsində yerləşən Müqəddəs Quran Muzeyində islam memarlığının cizgiləri ilə zəngin təbiət elementləri bir-birini tamamlayır. Bu harmoniya dizaynın orijinallığını təbiətin dincliyi ilə qovuşduraraq ziyarətçiləri salonlar boyu müşayiət edən xüsusi ab-hava formalaşdırır.

ArabAZ xəbər verir ki, Muzey boyunca islam memarlığının ruhundan qaynaqlanan tağlar, qübbəli strukturlar və dalğalı xətlər diqqət çəkir. Torpaq teksturasına malik səthlər və sakit rəng tonları arasına səpələnmiş ağaclar və bitkilər bu memarlıq mənzərəsinin canlı tərkib hissəsinə çevrilir.

Müqəddəs Quran Muzeyi Hira dağının ətəyində yerləşən Hira Mədəniyyət məhəlləsində ən mühüm guşələrindən biridir. Dağın bilavasitə yaxınlığında fəaliyyət göstərən və Məkkədə sırf Qurani-Kərimə həsr olunmuş ilk muzey sayılan bu məkan ziyarətçiləri müqəddəs kitabla yaxından tanış etmək, onun əzəmətini və ümumbəşəri mahiyyətini çatdırmaq, eləcə də müsəlmanların həyatına təsirini nümayiş etdirmək məqsədi daşıyır.

Muzey müasir texnologiyalardan, interaktiv və panoramik ekranlardan istifadə etməklə ziyarətçilərə maarifləndirici tarixi səyahət təklif edir. Burada Qurani-Kərimin nazil olması, toplanması, yazıya köçürülməsi və müxtəlif tarixi dövrlərdə çap edilməsi mərhələləri, eyni zamanda müsəlmanların bu kitabı qorumaq və yaymaq istiqamətindəki zəhmətləri əks olunur.

Muzey zəngin kolleksiyaya malikdir; burada nadir Quran əlyazmaları, tarixi nüsxələr, fərqli maddi-mədəniyyət nümunələri ilə yanaşı, ərəb xəttatlığı və islam incəsənətinin zərifliyini nümayiş etdirən xüsusi lövhələr və sənət əsərləri qorunur.