BAKI,AzerVoice, Azərbaycan İslam Ensiklopediyası
İslam məzhəbləri tarixində mötəzilə məzhəbinin qurucusu Vasil ibn Ətanın (v. 131/748) etiqadi fikirlərini qəbul edənlərə verilən ad. Əvvəllər Həsən əl-Bəsrinin tələbəsi olmuş Vasil ibn Əta müəllimi ilə “mürtəkibi-kəbirə”nin (böyük günah işləyən) mömin, yoxsa kafir olduğu mövzusunda mübahisə edərək ondan ayrılmışdır.
Vasililik (vasiliyyə) aşağıdakı dörd əsas üzərində qurulmuşdur:
1. Allahın “həyat”, “elm”, “qüdrət” və “iradə” kimi sifətləri Onun zatından ayrı deyildir.
2. Allah şər və zülm ehtiva edən hərəkətləri yaratmır. Buna görə də şərin yaradılımasını Allaha aid etmək doğru deyildir.
3. Böyük günah işləyən (mürtəkibi-kəbirə) nə mömin, nə də kafirdir; o, küfrlə-imanın arasında bir mövqedədir (əl-mənzilə beynəl-mənziləteyn).
4. Cəməl və Siffin döyüşlərində iştirak edən tərəflərdən biri mütləq xətalıdır, lakin hansının xətalı olduğu bilinmir. Ona görə də onlar haqqında qərarı Allaha həvalə etmək lazımdır.
