BAKI,AzerVoice
Haqsız rəqabət üzrə şikayətlərin əsas hissəsi kənd təsərrüfatı ilə bağlıdır.AzerVoice xəbər verir ki, bunu Bakıda keçirilən II Azərbaycan–Türkiyə İnvestisiya Forumunda çıxış edən Antiinhisar və İstehlak Bazarına Nəzarət Dövlət Agentliyi sədrinin müşaviri Cəfər Babayev bildirib.
Onun sözlərinə görə, təkcə bu il ərzində haqsız rəqabətlə bağlı 60-dan çox şikayət daxil olub və eyni sayda araşdırmaya başlanılıb.
Şikayətlərin əhəmiyyətli hissəsi kənd təsərrüfatı istehsalçıları ilə bağlıdır. C. Babayev qeyd edib ki, rəqabət mühitinin qorunmasında keyfiyyət infrastrukturu mühüm rol oynayır:
"Bu çərçivədə standartlaşdırma, məhsulların qablaşdırılması və satış formaları ilə bağlı tələblər bazar iştirakçıları üçün vacib elementlərdir. Onun sözlərinə görə, Azərbaycan Standartlaşdırma İnstitutu artıq texniki reqlamentlərin hazırlanması prosesinə başlayıb və yaxın dövrdə ölkədə ilk texniki reqlamentlərin tətbiqi gözlənilir".
Sədrin müşaviri əlavə edib ki, bu addımlar həm rəqabətin daha səmərəli tənzimlənməsinə, həm də istehsalçıların maraqlarının qorunmasına xidmət edəcək. O vurğulayıb ki, kənd təsərrüfatı məhsulları dövlət satınalmaları mexanizmi ilə birbaşa alınmasa da, bu sahədə xüsusi tənzimləmə və təminat mexanizmləri mövcuddur.
