BAKI,VOA Orxan Qədirzadə

Türkiyədə 2025-ci ildə dəniz məhsulları istehsalı əvvəlki illə müqayisədə 11,1 faiz artaraq 1 milyon 37 min 19 tona çatıb.

Rəsmi statistikaya əsasən, ümumi istehsalın 33,4 faizi dəniz balıqlarının ovlanması, 3,1 faizi digər dəniz məhsullarının ovlanması, 3,1 faizi daxili su hövzələrindən əldə olunan məhsullar, 60,4 faizi isə akvakultura yolu ilə istehsal olunan məhsulların payına düşüb.

Hesabat dövründə balıqçılıq yolu ilə əldə olunan ümumi məhsul həcmi 410 min 428 ton təşkil edib. Akvakultura təsərrüfatlarında istehsal olunan məhsulların həcmi isə 626 min 591 tona yüksəlib.

Məlumata görə, dəniz məhsullarının ovlanması bir il ərzində 17,3 faiz artıb. Bunun əksinə olaraq, daxili su hövzələrində balıq ovu 4,3 faiz azalıb.

2025-ci ildə ovlanan dəniz balıqlarının ümumi həcmi 346 min 366 ton olub. Növlər üzrə göstəricilər göstərir ki, ən çox ovlanan balıq növü 245 min 261 tonla hamsi olub.

Hamsidən sonra ən çox ovlanan növlər arasında 28 min 388 tonla çaça və 19 min 667 tonla sardina yer alıb.

Dəniz məhsulları sektorunda artımın əsas hərəkətverici qüvvələrindən biri də akvakultura sahəsi olub. Bu istiqamətdə istehsal həcmi ötən illə müqayisədə 8,6 faiz artıb.

Akvakultura yolu ilə əldə edilən 626 min 591 ton məhsulun 440 min 817 tonu və ya 70,4 faizi dənizlərdə, 185 min 774 tonu və ya 29,6 faizi daxili su hövzələrində istehsal edilib.

Daxili sularda yetişdirilən əsas balıq növü 185 min 310 ton istehsal həcmi ilə alabalıq olub.

Dəniz akvakulturasında isə ən yüksək istehsal göstəricisi 174 min 859 tonla levrək balığına məxsusdur. İkinci yerdə 164 min 643 ton istehsal həcmi ilə çipura qərarlaşıb.

Mütəxəssislər bildirirlər ki, son illərdə akvakultura sektoruna yatırılan investisiyalar və müasir istehsal texnologiyalarının tətbiqi Türkiyədə dəniz məhsulları istehsalının davamlı artımına mühüm təsir göstərir.

Qeyd edək ki, dəniz məhsulları istehsalına dair növbəti rəsmi statistik hesabatın 2027-ci ilin iyun ayında açıqlanması planlaşdırılır.