BAKI, AzerVoice, Orxan Qədirzadə
Türkiyənin yaxın tarixinin ən böyük büdcəli və qalmaqallı ekran əsərlərindən biri olan "Kurtlar Vadisi Irak" filmi həm ölkə daxilində, həm də beynəlxalq arenada geniş müzakirələrə səbəb olub.
Rejissor Serdar Akar tərəfindən 2006-cı ildə ekranlaşdırılan bu film, 14 milyon dollarlıq büdcəsi ilə Türkiyə kino sənayesində bir növ rekord müəyyənləşdirib.
Filmin süjet xətti 4 iyul 2003-cü ildə Şimali İraqda baş vermiş real hadisəyə — Amerika hərbçilərinin Türk qərargahına hücum edərək əsgərlərin başına kisə keçirməsi hadisəsinə əsaslanır. Polat Alemdar obrazı və komandasının bu hadisənin qisasını almaq üçün İraqa yollanması ilə başlayan süjet, bölgədəki ABŞ hərbçilərinin fəaliyyətlərini və yerli əhali ilə münasibətlərini tənqidi prizmadan nümayiş etdirir.
Film ABŞ Nümayəndələr Palatasında Condoliza Raysa hökumətin beynəlxalq nüfuzu ilə bağlı sualların ünvanlanmasına səbəb olan ilk türk ekran əsəri kimi tarixə düşüb. Baş rollarda Necati Şaşmaz, Gürkan Uyğun və Kenan Çobanla yanaşı, dünya şöhrətli aktyorlar Billi Zeyne və Qari Buseyin yer alması filmin beynəlxalq miqyasını artırıb. Billi Zeyne ona yönələn tənqidlərə cavab olaraq bildirib ki, kimsə bu müharibənin dəhşətlərini dünyaya çatdırmalı idi.
Almaniyada və Fransada "antisemitizm" və "irqçilik" ittihamları ilə qarşılaşan film, bir çox Avropa ölkələrində nümayişdən çıxarılsa da, Türkiyədə izləyici rekordları qırıb. Filmin ssenaristi Bahadır Özdener ekran əsərini "siyasi aksiya" kimi xarakterizə edərək, göstərilənlərin böyük hissəsinin həqiqətləri əks etdirdiyini vurğulayıb. Türkiyənin dövlət rəsmiləri tərəfindən də dəstəklənən layihə, İraq müharibəsinə fərqli bir yanaşma gətirməsi ilə yadda qalıb.
