BAKI,AzerVoice, Orxan Qədirzadə
1129-cu il 13 yanvar tarixində Fransanın Trua şəhərində keçirilən Trua Kilsə Məclisində Roma Papası Papa II Honori hərbi-dini təşkilat kimi tanınan Templar cəngavərlərinə rəsmi papalıq sanksiyası verdi və bu ordeni “Tanrının ordusu” elan etdi. Bu qərar Templarların hüquqi statusunu möhkəmləndirdi və onların Avropa–Yaxın Şərq siyasi-dini sistemində sürətlə güclənməsinə yol açdı.
Ordenin yaranması və məqsədi
Templar cəngavərləri 1118-ci ildə fransız əsilli sərkərdə Hüq de Payen tərəfindən yaradılmışdı. Ordenin əsas missiyası Səlib yürüşləri dövründə Müqəddəs Torpaqlara (Fələstin ərazilərinə) gedən xristian zəvvarların təhlükəsizliyini qorumaq idi.
İlk illərdə təşkilat cəmi doqquz üzvdən ibarət idi. Bunun səbəbi isə qəbul olunan son dərəcə sərt qaydalar idi. Templara üzv olmaq üçün: zadəgan mənşəli olmaq, yoxsulluq, itaət və subaylıq andı içmək, dünyəvi var-dövlətdən imtina etmək tələb olunurdu.
Sürətli yüksəliş və böyük sərvət
1127-ci ildən etibarən Avropada aparılan təbliğat fəaliyyəti nəticəsində ordenə çoxlu zadəgan qoşuldu. Bu, Templarların həm hərbi gücünü, həm də iqtisadi imkanlarını kəskin şəkildə artırdı. Onlar torpaqlar, qalalar, bank əməliyyatları və ianələr hesabına orta əsrlərin ən varlı və nüfuzlu təşkilatlarından birinə çevrildilər.
Süqut: xəyanət və məhv
XIV əsrin əvvəllərində Səlib yürüşlərinin uğursuzluqla başa çatması fonunda Templarların böyük sərvəti həm dünyəvi, həm də dini hakimiyyət dairələrində narahatlıq yaratdı.
1307-ci ildə Fransa kralı Filipp IV və Roma Papası Papa V Kliment birgə qərarla Templar ordeninə qarşı repressiya başlatdı. Ordenin böyük ustası Jak de Mole və digər rəhbər şəxslər bidətçilik, müqəddəsliyə hörmətsizlik və şeytanpərəstlik ittihamları ilə həbs olundular.
İşgəncə altında etiraflara məcbur edilən Templar liderləri tonqalda yandırıldı. 1312-ci ildə isə Papa V Kliment ordenin rəsmi olaraq ləğv edildiyini elan etdi.
Müasir dövrdə Katolik Kilsəsi Templarların təqibinin əsassız olduğunu qəbul edib və Papanın dünyəvi hakimlərin təzyiqi altında bu qərarı verdiyini bildirib.
Əsrlər boyu Templarlar haqqında saysız-hesabsız miflər formalaşıb. Onların: Müqəddəs Qədəhi, Əhd Sandığını, İsa Məsihin çarmıxından qalıqları tapdığına dair inanclar yayılıb.
Bu sirli obraz sonradan ədəbiyyat və kinoda geniş istifadə olunub; xüsusilə Da Vinçi şifrəsi kimi əsərlər bu mifləri populyarlaşdırıb.
