BAKI, AzerVoice, Orxan Qədirzadə
1966-cı il yanvarın 17-də Soyuq müharibə dövrünün ən təhlükəli nüvə insidentlərindən biri baş verib.
ABŞ Hərbi Hava Qüvvələrinə məxsus B-52 strateji bombardmançı təyyarəsi İspaniyanın Aralıq dənizi sahilləri üzərində yanacaq doldurarkən KC-135 tanker təyyarəsi ilə toqquşub. Qəza nəticəsində Palomares qəsəbəsi yaxınlığında hər biri 70 kiloton gücündə olan üç hidrogen bombası quruya, bir bombası isə dənizə düşüb.
Bombalar silahlanmamış vəziyyətdə olsa da, onlardan ikisindəki partlayıcı maddə yerə çırpılarkən işə düşüb və nəticədə əraziyə radioaktiv plutonium yayılıb. Üçüncü bomba quru yataqlı çaya düşərək nisbətən bütöv vəziyyətdə tapılıb. Dördüncü bomba isə dənizə düşərək aylarla aparılan axtarışlardan sonra yalnız 1966-cı ilin aprelində tapılıb.
Hadisədən sonra Palomares ərazisinə təxminən 2 min ABŞ hərbçisi və İspaniya təhlükəsizlik qüvvələri cəlb olunub, 1400 tona yaxın radioaktiv torpaq və bitki örtüyü ABŞ-a daşınıb. Qəza ABŞ-ın “Broken Arrow” adlandırılan nüvə insidentləri sırasında ən çox diqqət çəkən hadisələrdən biri olub.
