BAKI, VOA, Orxan Qədirzadə

29 mart 1973-cü ildə Vyetnam sülh sazişinin imzalanmasından iki ay sonra ABŞ-ın sonuncu döyüş bölmələri Cənubi Vyetnamı tərk edib. Bununla da Amerikanın Vyetnam müharibəsinə səkkiz illik birbaşa hərbi müdaxiləsi rəsmən başa çatıb.

Həmin tarixdə Hanoy administrasiyası Şimali Vyetnamda saxlanılan sonuncu amerikalı hərbi əsirləri azad edib. Lakin ABŞ ordusu geri çəkilsə də, Sayqonda Cənubi Vyetnam rejiminə kömək məqsədilə Müdafiə Nazirliyinin 7 minə yaxın mülki əməkdaşı qalıb. Müharibənin gedişatında 1969-cu ildə ABŞ hərbi qüvvələrinin sayı pik həddə — 550 min nəfərə çatmışdı.

Vyetnam müharibəsi ABŞ tarixinin ən uzunmüddətli və ən az rəğbət bəslənilən xarici müharibəsi hesab olunur. Bu münaqişə 58 min amerikalının həyatına son qoyub. Vyetnam tərəfindən isə itkilərin sayı dəhşətli rəqəmlərlə ölçülür: təxminən 2 milyon hərbçi və mülki şəxs həlak olub. 1973-cü il sülh sazişinə baxmayaraq, döyüşlər davam etmiş və 1975-ci il aprelin 30-da Sayqonun kommunist qüvvələri tərəfindən tutulması ilə Cənubi Vyetnam tamamilə süqut etmişdir.