Bakı,AzerVoice

Yeni bir araşdırma, artıq çəkili və ya piylənməsi olan yeniyetmələrin axşam saatlarında daha çox kalori qəbul etdiyini ortaya çıxarıb.

Araşdırma göstərir ki, bədənin daxili saatı gənclərin nə qədər və nə vaxt yeməsi ilə əlaqəli ola bilər.

Tədqiqatda artıq çəkili və ya piylənməsi olan yeniyetmələrin sağlam çəkiyə sahib olanlarla müqayisədə axşam saatlarında daha çox kalori qəbul etdiyi müəyyən edilib.

"Bu araşdırmaya başlayarkən sirkadiyen sistemin aclıq və maddələr mübadiləsinə təsir etdiyini bilirdik",- deyə ABŞ-dakı Harvard Tibb Məktəbinin tibb professoru və araşdırmanın müəlliflərindən biri olan Frank Scheer bildirib.

Lakin tədqiqatçılar bu əlaqənin işıq, yuxu və fəaliyyət dövrləri kimi ətraf mühit və davranış dövrlərindən təcrid olunduqda da davam edib-etmədiyini öyrənmək istədilər.

Araşdırmada 12-18 yaş arasında 50-dən çox yeniyetmə 11 gün və 10 gecə müddətində oyaq olduqları zaman zəif işıqlı, yatdıqları zaman isə tam qaranlıq olan nəzarət edilən qapalı bir mühitdə izlənilib.

Tədqiqatçılar iştirakçıların ənənəvi 24 saatlıq yuxu və oyanıqlıq dövrü əvəzinə 28 saatlıq bir proqram izlədiklərini qeyd ediblər. İştirakçıların sirkadiyen saatına təsir göstərə biləcək heç bir saat və ya təbii işıq mənbəyi olmayıb.

Artıq çəkili və ya piylənməsi olan yeniyetmələr günün sonrakı saatlarında daha çox kalori qəbul ediblər.

"Davranış və sirkadiyen dövrlərlə qidalanma arasındakı əlaqələri tam anlamış deyilik və bu münasibətin istiqaməti hələ aydın deyil", - deyə ABŞ-dakı Braun Universitetində psixiatriya və insan davranışları üzrə dosent və tədqiqatın müəlliflərindən biri olan David Barker bildirib.

Bədənin daxili saatı, qida qəbulu və çəki arasındakı əlaqəni daha yaxşı başa düşmək üçün əlavə araşdırmalara ehtiyac var.

Barkerin sözlərinə görə, gənclər arasındakı fərqlər "sirkadiyen sistemin özü necə işlədiyindən" deyil, "aclıq və toxluq hormonlarındakı fərqlərdən" və ya emosional və davranış amillərindən qaynaqlana bilər.