BAKI, VOA, Orxan Qədirzadə

ABŞ Müdafiə Nazirliyi (Pentaqon) İranla davam edən müharibə fonunda bölgəyə əlavə hərbi qüvvələr yerləşdirməyə hazırlaşır. Amerikanın ən elit bölmələrindən hesab olunan 82-ci Hava-Desant Diviziyasının təxminən 3 min hərbçisinin Orta Şərqə göndərilməsi məsələsi son mərhələdədir.

VOA xəbər verir ki, "Wall Street Journal" nəşrinin ABŞ rəsmilərinə istinadən yaydığı məlumata görə, Pentaqon hərbi birləşmələri "İranla müharibəyə dəstək" məqsədilə bölgəyə sövq edir. Rəsmi təlimatın hələ verilmədiyi bildirilsə də, qoşunların hərəkətə keçməsi üçün hazırlıqların tamamlandığı vurğulanıb.

82-ci Hava-Desant Diviziyası ABŞ ordusunun "təcili müdaxilə qüvvəsi" funksiyasını yerinə yetirir və 24 saat ərzində dünyanın istənilən nöqtəsinə yerləşdirilə bilər. Bu birliyin əsas tapşırıqlarına aşağıdakılar daxildir:

Strateji obyektlərin ələ keçirilməsi, hava limanlarının və mühüm ərazilərin paraşütlə eniş vasitəsilə tutulması.

Hörmüz boğazını güclə yenidən açılması üçün quruda və sahil zolağında hərbi fəaliyyətlər.

İranın körfəzdəki strateji adaları və ya sahil xəttini ələ keçirmək üçün mümkün quru əməliyyatları.

WSJ-nin xəbərində qeyd olunur ki, Pentaqon qoşunları bölgəyə göndərməyə hazır olsa da, Vaşinqton administrasiyası İrana birbaşa quru qoşunları yeritmək barədə hələ yekun qərar verməyib. Hazırda bu bölmələrin əsasən Hörmüz boğazında gəmilərin hərəkətini təmin etmək və ya İranın sahil boyu hərbi infrastrukturuna qarşı istifadə olunacağı ehtimal edilir. Bazar ertəsi verilən məlumatlar bölgədəki hərbi eskalasiyanın yeni və daha təhlükəli mərhələyə keçdiyini göstərir.