BAKI,VOA, Nailə Babazadə
İran İslam İnqilabı Keşikçiləri Korpusunun (SEPAH) İctimaiyyətlə Əlaqələr Bölməsi Hörmüz boğazından keçən gəmilərin hərəkəti ilə bağlı kritik qərarını açıqlayıb.
VOA xəbər verir ki, rəsmi bəyanatda bildirilir ki, "İsrail-Amerika ittifaqı"na və onları dəstəkləyən ölkələrə məxsus, eləcə də həmin limanlara istiqamətlənən bütün gəmilərin keçidi marşrutundan asılı olmayaraq qadağan edilib.
Bəyanatda bu səhər saatlarında üç fərqli ölkəyə məxsus konteyner gəmisinin icazəli dəhlizlərdən istifadə edərək boğazı keçmək cəhdinin qarşısının alındığı vurğulanır. SEPAH-ın Hərbi Dəniz Qüvvələrinin müdaxiləsi və xəbərdarlıqlarından sonra həmin gəmilər geri dönmək məcburiyyətində qalıblar.
SEPAH rəsmiləri ABŞ rəhbərliyinin "Hörmüz boğazı açıqdır" yönündəki açıqlamalarının həqiqəti əks etdirmədiyini və boğazın faktiki olaraq tam nəzarət altında qapalı saxlanıldığını bildiriblər. Bəyanatın sonunda qadağanı pozmağa çalışan istənilən tərəfə qarşı "ən sərt şəkildə" cavab veriləcəyi barədə xəbərdarlıq edilib.
