BAKI,VOA, Nailə Babazadə
İran İslam İnqilabı Keşikçiləri Korpusu (SEPAH) Hərbi Dəniz Qüvvələri strateji əhəmiyyətli Hörmüz boğazı yaxınlığında İsrail rejimi ilə əlaqəli olduğu iddia edilən "MSC Ishyka" adlı gəmiyə pilotsuz uçuş aparatları (PUA) vasitəsilə hücum təşkil etdiyini açıqlayıb.
VOA xəbər verir ki, SEPAH Hərbi Dəniz Qüvvələri Komandanlığının sosial media hesabından verilən bəyanatda bildirilir ki, "MSC Ishyka" gəmisinə Hörmüz boğazı mənzilində kamikadze PUA-larla birbaşa zərbə endirilib. Hücum nəticəsində gəmidə yanğın başladığı və gəminin ciddi zədələndiyi barədə məlumatlar daxil olub.
Xatırladaq ki, fevralın 28-dən etibarən ABŞ və İsrailin İrana qarşı başlatdığı hərbi əməliyyatlardan sonra Tehran rəhbərliyi Hörmüz boğazını böyük ölçüdə dəniz nəqliyyatı üçün bağladığını elan etmişdi. İran tərəfi boğazdan keçməyə cəhd edən və "düşmən ittifaqı" ilə əlaqəli olan bütün gəmilərin hədəf alınacağı barədə xəbərdarlıq etmişdi. Bu son insident bölgədəki qlobal enerji daşımaları və dəniz təhlükəsizliyi ilə bağlı narahatlıqları daha da artırıb.
