BAKI,VOA
İran Dövlət Televiziyası paytaxt Tehranın qərbində yerləşən nüfuzlu Şərif Texnologiya Universitetinin hücuma məruz qaldığını xəbər verib. VOA xəbər verir ki, rəsmi məlumatda hadisə növbəti aqressiya kimi xarakterizə edilib.
Məlumata görə, hücum universitetin infrastrukturuna və tədqiqat mərkəzlərinə ciddi ziyan vurub. Şərif Texnologiya Universiteti İranın "MİT"-i (Massaçusets Texnologiya İnstitutu) hesab olunur və ölkənin nüvə, raket və yüksək texnologiyalar sahəsində kadr potensialının mərkəzi sayılır.
ABŞ və İsrailin son günlər İranın mülki və strateji infrastrukturunu hədəf alacağı barədə xəbərdarlıqlarından sonra belə bir təhsil müəssisəsinin vurulması müharibənin yeni mərhələyə keçdiyini göstərir. Analitiklər qeyd edirlər ki, bu cür hücumlar rejimin gələcək texnoloji və hərbi inkişaf imkanlarını birbaşa iflic etmək məqsədi daşıyır.
Hazırda universitet ərazisində xilasetmə işlərinin aparıldığı və tələfata dair məlumatların dəqiqləşdirildiyi bildirilir. Hücumun raket zərbəsi, yoxsa pilotsuz təyyarələrlə həyata keçirildiyi barədə hələlik rəsmi təfərrüat açıqlanmayıb.
