BAKI,VOA, Orxan Qədirzadə
ABŞ Prezidenti Donald Trampın İran rəhbərliyinə çərşənbə axşamına qədər vaxt qoyaraq, Hörmüz boğazı açılmayacağı təqdirdə ölkənin bütün elektrik stansiyalarının və körpülərinin məhv ediləcəyini bəyan etməsi fonunda BMT Təhlükəsizlik Şurası strateji əhəmiyyətli su yolunun yenidən açılması üçün Rusiya və Çinin etirazları ilə mətni iki dəfə yumşaldılmış qərar layihəsini bu gün səsverməyə çıxarır.
VOA xəbər verir ki, Bəhreynin rəhbərliyi ilə hazırlanan ilkin sənəddə hərbi gücdən istifadəni nəzərdə tutan "bütün lazımi vasitələr" ifadəsi yer alsa da, son variantda bu, gəmilərin müşayiəti və müdafiə səylərinin əlaqələndirilməsi üçün dövlətlərə edilən "güclü çağırış" ilə əvəzlənib. Layihə İrandan beynəlxalq gəmiçiliyə qarşı bütün hücumları dərhal dayandırmağı tələb edir. Diplomatik mənbələr qərarın qəbulu üçün ən azı 9 lehinə səs lazım olduğunu, lakin daimi üzvlərin veto riskinin hələ də qaldığını bildirirlər.
Xatırladaq ki, İran martın 2-dən bəri strateji neft dəhlizini bağlayaraq qlobal iqtisadi böhrana və birja itkilərinə səbəb olub. Tehran isə boğazın açılması üçün müharibənin tamamilə dayandırılmasını şərt qoyur. Hazırda dünya birliyi həm BMT-dəki səsvermənin nəticəsini, həm də Trampın ultimatumunun bitəcəyi saatı gözləyir.
