BAKI,VOA, Orxan Qədirzadə
Yaxın Şərqdə gərginlik pik həddə çatıb. ABŞ Prezidenti Donald Tramp Hürmüz boğazı və İran limanlarına qarşı genişmiqyaslı dəniz blokadasının başlanacağı vaxtı elan edib.
VOA xəbər verir ki, ABŞ Mərkəzi Komandanlığı (CENTCOM) və Prezident Donald Trampın rəsmi bəyanatına əsasən, aprelin 13-ü İran saat ilə 17:00-da ABŞ donanması İran limanlarına giriş-çıxış edən bütün gəmiləri mühasirəyə alacaq. İslamabadda aparılan vasitəçilik danışıqlarının uğursuzluqla nəticələnməsindən sonra atılan bu addım, İranın bütün sahil xəttini və strateji limanlarını əhatə edəcək.
ABŞ tərəfi bildirib ki, blokada yalnız İran limanlarına hədəflənib və Hörmüz boğazından keçən digər ölkələrin gəmilərinə toxunulmayacaq. Lakin Tramp qeyd edib ki, İrana qanunsuz keçid edən hər bir gəmi dayandırılacaq və boğazdakı minaların təmizlənməsinə başlanacaq. İran tərəfi isə bu addımı "atəşkəsin pozulması" kimi qiymətləndirib. İranın Müdafiə Nazirliyi Hörmüz boğazı üzərində nəzarətin əbədi olaraq Tehranın əlində qalacağını bəyan edərək, ABŞ-a sərt xəbərdarlıq edib. Prezident Pezeşkian isə ABŞ-ı "maksimalist" yanaşmadan əl çəkməyə və İran xalqının haqlarına hörmət etməyə çağırıb.
