BAKI,VOA, Fərid Mikayılov

İran ABŞ-nin “dəniz ablukası” ilə bağlı bəyanatlarından sonra bölgədəki limanların təhlükəsizliyi ilə bağlı sərt mövqe ortaya qoyub.

VOA xəbər verir ki, İran Silahlı Qüvvələrinin Hatəmu-l Ənbiya Mərkəzi Qərargahının sözçüsü İbrahim Zülfiqari açıqlamasında bildirib ki, ölkənin Fars körfəzi və Oman dənizindəki limanlarına qarşı hər hansı təhdid cavabsız qalmayacaq.

Məlumata əsasən, Zülfiqari qeyd edib ki, İran öz ərazi sularında təhlükəsizliyi təmin etməkdə qərarlıdır. O bildirib ki, ABŞ və İsraillə əlaqəli gəmilərin Hörmüz boğazından keçidinə icazə verilməyəcək, digər gəmilər isə koordinasiya əsasında hərəkət edə biləcəklər.

Bildirilib ki, ABŞ-nin İran gəmilərinə qarşı beynəlxalq sularda müdaxilə planı qanunsuz addım kimi qiymətləndirilir.

Zülfiqari vurğulayıb ki, əgər İran limanlarının təhlükəsizliyi təhdid edilərsə, bölgədə heç bir liman təhlükəsiz olmayacaq.