BAKI,VOA
İran Xarici İşlər nazirinin müavini bölgədəki hərbi-siyasi vəziyyət və Vaşinqtonla aparılan danışıqlar barədə geniş bəyanatla çıxış edərək, ABŞ-ın diplomatik səylərə xələl gətirdiyini bildirib. Nazir müavini Hörmüz boğazında naviqasiyanın asanlaşdırılmasına hazır olduqlarını, lakin Amerika tərəfinin ziddiyyətli mövqe nümayiş etdirdiyini vurğulayıb.
"Trampın bəyanatları ziddiyyətlidir"
VOA xəbər verir ki, İranlı rəsmi ABŞ Prezidenti Donald Trampın son çıxışlarına toxunaraq, Vaşinqtonun qeyri-müəyyən siyasət yürütdüyünü qeyd edib.
"Tramp çox danışır və eyni bəyanat daxilində bir-birinə zidd olan fikirlər səsləndirir. Amerika dərk etməlidir ki, artıq müstəmləkəçilik dövrü geridə qalıb və müharibə heç bir müsbət həll yoluna gətirib çıxara bilməz."-deyə o bildirib.
O əlavə edib ki, gələcəkdə hər hansı bir mühasirə qəbulolunmazdır və heç kim öz iradəsini İrana diktə edə bilməz.
"Diplomatiyaya xəyanət edildi"
Tehranın danışıqlar masasında xoş niyyət nümayiş etdirdiyini bildirən nazir müavini, ABŞ-ın etibarsız tərəfdaş olduğunu iddia edib.
"Biz iki raund danışıqlara səmimiyyətlə daxil olduq, lakin onlar diplomatiyaya xəyanət etdilər. Buna görə də biz bundan sonra daha ehtiyatlı olacağıq. İranın qəbul edəcəyi hər bir razılaşma mütləq beynəlxalq hüquq çərçivəsində olmalıdır, çünki biz öz hüquqlarımıza sadiqik."-deyə iranlı diplomat əlavə edib.
