BAKI,VOA, Orxan Qədirzadə
İran xarici işlər naziri Abbas Əraqçi ölkəsinin xarici təzyiqlərə qarşı sərt mövqe tutacağını bəyan edib.
VOA xəbər verir ki, Əraqçi ABŞ-ın İran limanlarına tətbiq etdiyi dəniz blokadasını “müharibə aktı” kimi qiymətləndirərək, bunun atəşkəs rejiminin kobud şəkildə pozulması olduğunu bildirib.
Nazir vurğulayıb ki, İran məhdudiyyətləri zərərsizləşdirmək, milli maraqlarını qorumaq və istənilən təzyiqə qarşı müqavimət göstərmək gücünə malikdir.
Bəyanat regionda atəşkəs müddətinin başa çatdığı və İranın ABŞ-ın İslamabadda keçirilməsi planlaşdırılan danışıqlarına hələ rəsmi cavab vermədiyi bir vaxta təsadüf edir.
Qeyd olunur ki, Tehran Vaşinqtonla mümkün danışıqlar öncəsi dəniz blokadasının aradan qaldırılmasını əsas şərt kimi irəli sürür.
Analitiklər hesab edir ki, bu mövqe İranın diplomatik manevr imkanlarını qorumağa yönəlib və regionda gərginliyin növbəti mərhələyə keçə biləcəyini göstərir.
