BAKI,VOA, Nailə Babazadə

İranın Məhkəmə Hakimiyyətinin rəhbəri Qulamhüseyn Möhsüni Ejei ABŞ Prezidenti Donald Trampın Hörmüz boğazı ilə bağlı bəyanatlarına kəskin reaksiya verib.

VOA xəbər verir ki, Ejei sosial media hesabından etdiyi açıqlamada Amerika ordusunun bu stratejik su yoluna yaxınlaşmağa cəsarət edə bilməyəcəyini iddia edib. O İran ordusunun bölgədəki varlığını yüksək qiymətləndirərək dünən boğazda qayda pozuntusuna yol verən üç gəmiyə qarşı hüquqi tədbirlərin görüldüyünü bildirib.

İranlı rəsmi aprelin on ikisində ABŞ-a məxsus Peterson və Murphy freqatlarının Hörmüz boğazından gizli şəkildə keçmək cəhdinin İslam İnqilabı Keşikçiləri Korpusu tərəfindən dayandırıldığını xatırladıb. Ejei amerikalıların bu müasir hərbi gəmilərin başına nələrin gəldiyini gördüklərini və hazırda Fars körfəzindəki Faror adasında yerləşən dəniz mağaralarında İranın sürətli qayıqları ilə insansız dəniz aparatlarının ABŞ gəmilərini səbirsizliklə gözlədiyini vurğulayıb.

Xatırladaq ki ABŞ Prezidenti Donald Tramp bir müddət əvvəl hərbi dəniz qüvvələrinə Hörmüz boğazına mina döşəyən hər hansı qayığın ölçüsündən asılı olmayaraq dərhal vurulub məhv edilməsi barədə qəti əmr verdiyini açıqlamışdı. Tramp bu məsələdə heç bir tərəddüdün olmayacağını bəyan etmişdi. Digər tərəfdən Amerikanın Washington Post qəzetinə danışan rəsmilər Hörmüz boğazındakı minaların təmizlənməsi prosesinin təxminən altı ay davam edə biləcəyini qeyd ediblər.