BAKI,VOA

İsrailin Baş naziri Benyamin Netanyahu "CBS" şəbəkəsinə verdiyi müsahibədə İranla davam edən gərginlik və qarşıda duran hədəflər barədə mühüm açıqlamalar verib. Baş nazir bildirib ki, böyük nailiyyətlər əldə olunmasına baxmayaraq, İranla müharibə hələ bitməyib. Netanyahunun sözlərinə görə, İranın hərbi potensialına ciddi zərbə vurulsa da, görülməli olan çox iş var.

VOA xəbər verir ki, Netanyahu vurğulayıb ki, İranda hələ də çıxarılmalı olan zənginləşdirilmiş uran mövcuddur və zənginləşdirmə obyektləri mütləq sökülməlidir. O qeyd edib ki, Tehran hələ də regional proksi qüvvələrini dəstəkləməkdə davam edir və ballistik raketlərin istehsalı üzərində işləyir.

Rejimin süqutu və Hörmüz boğazı

İran rejiminin devrilməsi ehtimalına toxunan Baş nazir bunun mümkün olduğunu, lakin zəmanət verilmədiyini və vaxtını proqnozlaşdırmağın çətinliyini bildirib.

"Əgər İran rejimi süqut edərsə, bu, 'Hizbullah' və 'Həmas'ın sonu, bəlkə də husilərin sonu demək olacaq."-deyə o qeyd edib.

Netanyahu həmçinin döyüşlər davam etdikcə Hörmüz boğazının bağlanma risklərinin daha aydın görünməyə başladığını deyib. O bildirib ki, İran naviqasiya təhlükəsizliyini təhdid etməyin gətirəcəyi risklərin miqyasını anlamaq üçün çox uzun vaxt sərf edib.

İsrailin kəşfiyyat imkanlarından danışan Netanyahu, "hər şeyi izləyən gözlərimiz və qulaqlarımız var, lakin lazım gələndə susmağı üstün tuturam" deyə əlavə edib.

Çinin rolu və təbliğat müharibəsi

Baş nazir Çinin İranın raket istehsalı üçün texniki komponentlər və dəstək təmin etməsindən narazılığını ifadə edərək , :"Çin İranın raket istehsalına texniki dəstək və komponentlər verib və bu, mənim xoşuma gəlmir."-deyib.

Sonda Netanyahu İsrailin beynəlxalq mediada blokada və təbliğat kampaniyası ilə üzləşdiyini, ölkəsinin təbliğat müharibəsində hələ ki kifayət qədər uğur qazanmadığını etiraf edib.