Fələstin İnsan Haqları Mərkəzi İsrailin müdafiə naziri İsrael Katsın Qəzza zolağından çoxsaylı fələstinlilərin çıxarılması ilə bağlı açıqlamalarını pisləyib. Təşkilat bu cür addımların ərazinin demoqrafik quruluşunu dəyişdirmək məqsədi daşıdığını bildirib.
ArabAZ xəbər verir ki, İsrael Kats çərşənbə günü keçirdiyi mətbuat konfransında Qəzza üçün “köç olmadan real həll yolunun olmadığını” deyib və fələstinlilərin dəniz, quru və hava yolu ilə ərazidən çıxarılması planının ABŞ-nin razılığını gözlədiyini bildirib.
Kats ABŞ Prezidenti Donald Trampın bu planı dayandırdığını, lakin tamamilə ləğv etmədiyini və İsrailin insanları “mümkün olan bütün yollarla” köçürməyə hazır olduğunu söyləyib.
Fələstin İnsan Haqları Mərkəzi cümə günü yaydığı açıqlamada bu bəyanatların və İsrail Baş naziri Benyamin Netanyahunun İsrail qüvvələrinin Qəzzanın təxminən 60 faizinə nəzarət etdiyi barədə açıqlamasının ərazinin demoqrafik vəziyyətini dəyişdirməyə yönəlmiş məqsədyönlü siyasət olduğunu iddia edib.
Təşkilat bildirib ki, fələstinlilərin istər zorla, istərsə də humanitar yardım adı altında ərazidən çıxarılması beynəlxalq hüquqa zidd məcburi köçürülmə hesab olunur.
Mərkəz Qəzza Səhiyyə Nazirliyinin məlumatlarına istinad edərək müharibə başlayandan bəri 73 min 470 fələstinlinin öldüyünü, 174 min 540 nəfərin isə yaralandığını açıqlayıb.
Təşkilat həmçinin İsrailin tikinti materiallarına tətbiq etdiyi məhdudiyyətlər səbəbindən bərpa işlərinin başlamadığını və binaların 80 faizindən çoxunun dağıldığını və ya zərər gördüyünü bildirib.
