İsraildə oktyabr ayına təyin olunmuş parlament seçkilərində Baş nazir Benyamin Netanyahunun əsas rəqibi hesab edilən Qadi Ayzenkot bazar ertəsi keçirilən seçkiqabağı mitinqdə hökumət başçısını şəxsi və siyasi maraqlarını dövlətin təhlükəsizliyindən üstün tutmaqda günahlandırıb.
ArabAZ xəbər verir ki, İsrail ordusunun sabiq Baş Qərargah rəisi 27 oktyabr seçkiləri üçün sədri olduğu "Yaşar" partiyasının namizədlər siyahısını açıqlayıb. O, 7 oktyabr 2023-cü ildə "HƏMAS" tərəfindən İsrailin cənubuna həyata keçirilən və ölkə tarixinin ən qanlı hücumu sayılan hadisələrdən bəri Baş naziri öz üzərinə düşən vəzifə və məsuliyyətləri yerinə yetirməməkdə, səhlənkarlıq göstərməkdə sərt tənqid edib.
Roş-Haayin yaşayış məntəqəsində təşkil olunan seçki toplantısında çıxış edən Ayzenkot bildirib ki, : "7 oktyabrda yaranan dərin çat və İsrail dövlətinin üzləşdiyi ağır təhdidlər fonunda bizə məsuliyyət səviyyəsinə yüksələ bilən, xalqı birləşdirməyi və sionizmin prinsiplərini bərpa etməyi bacaran liderlik lazımdır".
İsrailin "Kan" ictimai yayım korporasiyasının bazar günü dərc etdiyi ən son ictimai rəy sorğusunun nəticələrinə görə, qarşıdakı seçkilərdə Qadi Ayzenkotun rəhbərlik etdiyi "Yaşar" partiyasının Knessetdəki 120 yerdən 23-nü qazanaraq Benyamin Netanyahunun lideri olduğu "Likud" partiyasını (20 yer) geridə qoyacağı proqnozlaşdırılır.
Sorğuya əsasən, müxalifət düşərgəsindəki partiyalar 51 mandat, "Likud" ilə koalisiya qurması ehtimal edilən sağ blok isə 52 mandat əldə edə bilər. Parlamentdə mütləq çoxluq təşkil edən 61 mandata heç bir tərəfin təkbaşına çatmadığı təqdirdə, hökumətin formalaşdırılması üçün digər siyasi qüvvələrlə, xüsusən də sorğuda 13 mandat qazanacağı ehtimal edilən ərəb əsilli namizədlərin təmsil olunduğu iki partiya ilə ittifaq qurulması zərurəti yarana bilər.
