BAKI,VOA Yusif Şərifzadə
ABŞ Mərkəzi Komandanlığı İran limanlarına qarşı tətbiq olunan dəniz blokadası nəticəsində onlarla kommersiya gəmisinin marşrutunu dəyişdirdiyini açıqlayıb.
VOA xəbər verir ki, ABŞ Mərkəzi Komandanlığının məlumatına əsasən, blokada səbəbindən 65 kommersiya gəmisinin istiqaməti dəyişdirilib, daha dörd gəmi isə fəaliyyət qabiliyyətini itirib.
Məlumatda qeyd olunub ki, ABŞ qüvvələri Hörmüz boğazında ticarət marşrutlarının təhlükəsizliyini təmin etmək və İrana qarşı tətbiq olunan blokadanı davam etdirmək məqsədilə əməliyyatlarını genişləndirir.
İran rəsmiləri isə Hörmüz boğazına nəzarətin tam şəkildə onların əlində olduğunu bildiriblər. Tehran tərəfi vurğulayıb ki, İran İnqilab Keşikçiləri Korpusunun icazəsi olmadan heç bir gəminin boğazdan keçidinə icazə verilmir.
Keçən həftə ABŞ Mərkəzi Komandanlığının sözçüsü Tim Hokins açıqlamasında Hörmüz boğazında əsas prioritetlərin kommersiya gəmiləri üçün təhlükəsiz marşrutların qorunması və İrana qarşı blokada tədbirlərinin davam etdirilməsi olduğunu bəyan etmişdi.
