İran rəsmisinin Moskva səfəri hansı mesajları verir?

İran və Rusiya arasında siyasi və təhlükəsizlik əlaqələrinin diqqət mərkəzində olduğu bir dövrdə İran Ali Milli Təhlükəsizlik Şurası rəhbərliyinin yüksək səviyyəli nümayəndəsi Moskvaya səfər edib. İran rəsmisinin beynəlxalq təhlükəsizlik forumunda iştirakı iki ölkə arasında davam edən strateji əməkdaşlıq fonunda xüsusi diqqət çəkir. Təhlükəsizlik, regional münaqişələr və qlobal geosiyasi dəyişikliklərin müzakirə olunduğu tədbirə onlarla ölkənin nümayəndələrinin qatıldığı bildirilir. Ekspertlər hesab edirlər ki, İran–ABŞ münasibətlərində davam edən gərginlik və Yaxın Şərqdə baş verən hadisələr fonunda Tehran–Moskva əlaqələrinin inkişafı yeni siyasi və təhlükəsizlik dinamizmi yarada bilər

26 May 2026 19:11

BAKI,VOA,Yusif Şərifzadə

İran və Rusiya arasında təhlükəsizlik sahəsində diplomatik təmaslar davam edir.

VOA xəbər verir ki, İran Ali Milli Təhlükəsizlik Şurası katibinin müavini Əli Baqeri təhlükəsizlik forumunda iştirak etmək məqsədilə Rusiyaya səfər edib.

İran dövlət mediasının yaydığı məlumata əsasən, Əli Baqerinin forum çərçivəsində çıxış etməsi, həmçinin yüksək vəzifəli rusiyalı siyasi və təhlükəsizlik rəsmiləri ilə görüşlər keçirməsi planlaşdırılır.

Məlumata görə, Beynəlxalq Təhlükəsizlik Forumu regional və qlobal təhlükəsizlik məsələlərinin müzakirə olunduğu Rusiyanın ən mühüm illik tədbirlərindən biri hesab olunur.

Forumun 14-cü buraxılışının çərşənbə axşamı başladığı və tədbirin dörd gün davam edəcəyi bildirilib. Tədbirdə 120 ölkədən nümayəndələrin iştirak etdiyi qeyd olunub.

Səfərin İran və ABŞ arasında davam edən gərginlik fonunda Moskva ilə Tehran arasında siyasi və hərbi əməkdaşlığın genişləndiyi bir dövrə təsadüf etdiyi bildirilir.