BAKI,VOA,Yusif Şərifzadə

İran rəsmiləri ABŞ ilə artan gərginlik fonunda hərbi cavab tədbirlərini “qanuni müdafiə addımları” kimi təqdim etsələr də, mövcud atəşkəsin tamamilə pozulduğunu bəyan etməkdən yayınırlar.

VOA xəbər verir ki, İran İnqilab Keşikçiləri Korpusu (SEPAH) və digər rəsmi qurumlar son açıqlamalarında ABŞ ilə mövcud atəşkəs və Küveytdə yerləşən ABŞ hərbi bazasına qarşı həyata keçirilən cavab hücumları ilə bağlı daha ehtiyatlı ritorikadan istifadə edirlər.

Rəsmi Tehranın mövqeyinə görə, həyata keçirilən əməliyyatlar ABŞ-ın atəşkəsi dəfələrlə pozmasına qarşı “qanuni cavab” xarakteri daşıyır. Bununla belə, İran tərəfi hazırkı vəziyyəti tam şəkildə pozulmuş atəşkəs kimi təqdim etmir və mövcud razılaşmadan rəsmi olaraq çıxmadığını vurğulayır.

İran rəsmiləri açıqlamalarında regional qarşıdurma ilə bağlı mövqelərini də fərqləndirməyə çalışırlar. Tehran tərəfi həyata keçirilən hərbi əməliyyatları ölkənin suverenliyi və ərazi bütövlüyünün müdafiəsinə yönəlmiş “legitim addımlar” kimi xarakterizə edir.

Analitiklər hesab edirlər ki, İranın bu yanaşması Tehranın bir tərəfdən hərbi təzyiq və cavab əməliyyatlarını davam etdirdiyini, digər tərəfdən isə diplomatik kanalların tam bağlanmasının qarşısını almağa çalışdığını göstərir.

Ekspertlərin fikrincə, İran rəhbərliyi mövcud vəziyyətdə həm daxili auditoriyaya güc nümayiş etdirmək, həm də beynəlxalq ictimaiyyət qarşısında müharibəni genişləndirmək istəməyən tərəf obrazını qorumağa çalışır.

Son günlər ABŞ və İran arasında qarşılıqlı hücumlar, sanksiyalar və sərt bəyanatlar regionda gərginliyi daha da artırsa da, tərəflərin tammiqyaslı müharibədən yayınmağa çalışdığı müşahidə olunur.

Müşahidəçilər qeyd edirlər ki, Tehran tərəfindən istifadə olunan ehtiyatlı diplomatik dil gələcək mümkün danışıqlar və vasitəçilik təşəbbüsləri üçün siyasi manevr imkanlarını açıq saxlamağa hesablanıb.