BAKI,VOA,Yusif Şərifzadə
Livan Parlamentinin spikeri Nəbih Berri ABŞ vasitəçiliyi ilə hazırlanmış İsrail-Livan atəşkəs razılaşmasını rədd edib. Dövlətə məxsus Milli Xəbər Agentliyinin (NNA) məlumatına görə, Berri razılaşma mətnində şərtlərlə bağlı problemləri əsas gətirib.
VOA xəbər verir ki, Berri bəyan edib: “Əgər mətnin əvvəlində heç bir şərt olmadan, quru, dəniz və hava üzrə tam atəşkəs barədə məlumat olsaydı, müsbət bir şey oxuya bilərdik. Lakin mətn Həzbollahın tam atəşkəsi və onun Litani çayının cənubundan bütün elementlərinin çıxarılması kimi şərtlərlə “tələyə salınıb”.”
O, yalnız aşağıdakı şərtlərlə razılaşmağa hazır olduğunu bildirib:
Quru, dəniz və hava üzrə heç bir məhdudiyyət və şərt olmadan tam və hərtərəfli atəşkəs, mövcud hər hansı infrastrukturun dağıdılmaması;
İsrailin işğal etdiyi ərazilərdən geri çəkilməsi ilə paralel olaraq Həzbollahın Litani çayının cənubundan geri çəkilməsi.
Berri vurğulayıb ki, yalnız bu şərtlərlə davamlı sülh və regional stabillik mümkündür.
