BAKI,VOA, Fərid Mikayılov

İran 2026-cı ilin əvvəlində ölkədə baş verən hökumət əleyhinə nümayişlərdə iştirak etməkdə təqsirləndirilən iki şəxsin bu səhər edam edildiyini açıqlayıb.

VOA xəbər verir ki, edam edilən şəxslər – Cavad Zamani (Javad Zamani) və Əbülfəzl Səidi (Abolfazl Saedi) "2026-cı ilin əvvəlində baş verən iğtişaşların silahlı liderləri" kimi xarakterizə olunub.

Məhkəmənin qərarı ilə hər iki şəxs ictimai asayişi pozma, milli təhlükəsizliyə qarşı sui-qəsd və dövlət/ictimai əmlaka ziyan vurma kimi ağır ittihamlarla təqsirli bilinərək ölüm hökmünə məhkum ediliblər.

İranda insan haqlarının vəziyyəti isə beynəlxalq qurumların diqqət mərkəzində qalmaqdadır. Dünən Birləşmiş Millətlər Təşkilatının (BMT) İnsan Hüquqları üzrə Ali Komissarı Volker Türk mövzu ilə bağlı kəskin bəyanat yayıb.

Ali Komissar qeyd edib ki, rəsmi Tehran 2026-cı ilin başlanğıcından bəri "milli təhlükəsizlik əsasları" ilə 18-i birbaşa etirazçı olmaqla, azı 40 nəfəri edam edib. BMT rəsmisi İran hakimiyyətini nümayişçilərə qarşı "qəddar repressiyaları" və təzyiqləri kəskin şəkildə intensivləşdirməkdə ittiham edib.