BAKI,VOA,Yusif Şərifzadə
ABŞ ordusu İran limanları və sahil ərazilərinə qarşı elan edilən dəniz blokadasının iyulun 14-də başlayacağını açıqlayıb. Qərarın İranın cənub sahillərində yerləşən liman və neft terminallarını əhatə edəcəyi bildirilib.
VOA xəbər verir ki, ABŞ Hərbi Dəniz Qüvvələrinin rəhbərlik etdiyi Birgə Dəniz Məlumat Mərkəzi tərəfindən yayılan açıqlamada İran limanları və sahil ərazilərinə qarşı blokadanın Qrinviç vaxtı ilə saat 20:00-da qüvvəyə minəcəyi qeyd olunub.
Açıqlamada bildirilib ki, ABŞ Mərkəzi Komandanlığı İranın bütün limanları və sahil ərazilərinə qarşı dəniz blokadasının icrasına başlayacaq. Neytral gəmilərə isə blokada qüvvəyə minənədək ərazini tərk etmək barədə xəbərdarlıq edilib.
Bildirilib ki, blokada İranın cənub sahillərinin tamamını, o cümlədən limanları və neft terminallarını əhatə edəcək.
ABŞ tərəfi qeyd edib ki, tədbirlər İranla əlaqəsi olmayan istiqamətlərə Hörmüz boğazı vasitəsilə həyata keçirilən neytral gəmi keçidlərinə mane olmayacaq. Humanitar yüklərin daşınmasına isə yoxlamalardan sonra icazə veriləcəyi bildirilib.
Açıqlamada həmçinin İranın blokadadan yayınmasına kömək edən gəmilərin, o cümlədən gəmidən-gəmiyə yük ötürmələri həyata keçirən vasitələrin yoxlamaya cəlb ediləcəyi qeyd olunub.
ABŞ tərəfi bildirib ki, blokada qaydalarına əməl etməyən və hərbi qüvvələrin tələblərinə dərhal cavab verməyən gəmilərə qarşı sərt tədbirlər görülə bilər.
İran isə daha əvvəl Hörmüz boğazında öz rolunu qoruyacağını və bu strateji su yolunda nəzarət mövqeyindən geri çəkilməyəcəyini açıqlayıb.
