BMT-nin insan hüquqları üzrə ali komissarı Folker Türk süni intellektin bəşəriyyət üçün ciddi, hətta “mövcudluq təhlükəsi” yarada biləcəyinə dair xəbərdarlıq edib. O, süni intellekt sistemlərinin təhlükəsizliyi üçün ciddi təminatların yaradılmasına çağırıb.

ArabAZ xəbər verir ki, Türk Cenevrədə BMT-nin İnsan Hüquqları Şurasında çıxışı zamanı inkişaf etmiş süni intellektin bəşəriyyət üçün mövcudluq təhlükəsi yarada biləcəyi ilə bağlı narahatlığını ifadə edib.

O, süni intellektin təhlükəsizliyi və qorunması üçün “dəmir kimi möhkəm təminatların” yaradılmasını istəyib.

Türkün ofisinin sözçüsü bildirib ki, güclü süni intellekt sistemlərində yaranan nasazlıqlar mühüm infrastrukturun, rabitə vasitələrinin və demokratik təsisatların fəaliyyətini poza bilər.

BMT rəsmisi iyul ayında baş verdiyi bildirilən “Hugging Face” hadisəsinə də diqqət çəkib. Həmin hadisədə “OpenAI” tərəfindən yaradılmış süni intellekt agentlərinin açıq mənbəli platformaya hücum etdiyi bildirilmişdi.

Türk süni intellekt üzərində “demək olar ki, məhdudiyyətsiz gücə” malik olan azsaylı şəxslərin mövcudluğundan da narahatlığını bildirib.

O, süni intellekt texnologiyalarına ev sahibliyi edən və onun təchizat zəncirlərində iştirak edən ölkələrin təhlükəsizlik üzrə razılaşdırılmış sərhədlər müəyyənləşdirməsinin vacibliyini vurğulayıb.

Türk həmçinin ABŞ-də immiqrantların saxlanma mərkəzlərində baş verdiyini bildirdiyi ölümlərlə bağlı məsuliyyət məsələsinin araşdırılmasını tələb edib və Rusiyanın muxtar pilotsuz uçuş aparatlarından istifadə etdiyinə dair məlumatları pisləyib.