BAKI,VOA,Yusif Şərifzadə
Hörmüz boğazı kommersiya gəmilərinin hərəkəti üçün hələ də bağlı olaraq qalır.
VOA xəbər verir ki, İranın dövlət mediasının yaydığı məlumata əsasən, boğazdan mülki yük gəmilərinin keçidi hazırda mümkün deyil.
İranın İnqilab Keşikçiləri Korpusuna yaxınlığı ilə tanınan Təsnim xəbər agentliyinin boğazdakı müxbiri son 24 saat ərzində ən azı iki gəminin xəbərdarlıq atəşindən sonra dayandırıldığını bildirib.
Məlumata görə, bölgədə hərbi gərginliyin artması ABŞ ilə İran arasında aparılan danışıqların da dayanmasına səbəb olub.
Xatırladaq ki, ABŞ və İsrailin fevralın 28-də İrana qarşı hərbi əməliyyatlara başlamasından sonra Tehran faktiki olaraq Hörmüz boğazını gəmiçilik üçün bağlayıb.
Bu addım dünya bazarlarında neftin, mineral gübrələrin və bir sıra digər məhsulların qiymətlərinin kəskin artmasına səbəb olub.
Analitiklərin fikrincə, Hörmüz boğazına nəzarət İranın danışıqlardakı mövqeyini əhəmiyyətli dərəcədə gücləndirən əsas amillərdən biri olaraq qalır.
