BAKI,VOA,Yusif Şərifzadə

İran ABŞ-ın bölgədəki hərbi hücumlarının qonşu ölkələrin hava məkanı və ərazisindən həyata keçirildiyini əsas gətirərək, həmin dövlətlərə cavab vermək hüququna malik olduğunu bildirir.

VOA xəbər verir ki, “Əmvac.media” nəşrinin baş redaktoru Məhəmməd Əli Şabani bu barədə “Əl-Cəzirə” telekanalına açıqlamasında danışıb.

Onun sözlərinə görə, Tehran özünü ABŞ ilə birbaşa müharibə vəziyyətində hesab edir və İrana qarşı hücumlar üçün hava məkanını, ərazisini və ya hərbi imkanlarını təqdim edən istənilən ölkəyə cavab verə biləcəyini düşünür.

Şabani bildirib ki, İranın yanaşmasına əsasən, ABŞ hücumlarının hansı ölkənin ərazisindən həyata keçirilməsi həmin dövlətin də qarşıdurmanın bir hissəsinə çevrilməsi kimi qiymətləndirilə bilər.

O qeyd edib ki, Körfəz ölkələri coğrafi yaxınlıq səbəbindən İranla dostluq və sabit münasibətlərin qorunmasında maraqlıdırlar.

Ekspertin fikrincə, bölgə dövlətləri ABŞ və İsrailin İrana qarşı apardığı müharibənin başa çatdırılması üçün Tehranla müəyyən səviyyədə dialoqun davam etdirilməsinə ehtiyac duyurlar.

Şabani əlavə edib ki, Körfəz ölkələrinin əsas məqsədi qarşıdurmanın öz ərazilərinə yayılmasının qarşısını almaq və bölgədə təhlükəsizliyi qorumaqdır.