BAKI,VOA,Yusif Şərifzadə
İranın birinci vitse-prezidenti Məhəmməd Rza Arif ABŞ-ı Vaşinqton və Tehran arasında imzalanmış anlaşma memorandumunu (MoU) pozmaqda ittiham edib. O bildirib ki, ABŞ memorandum imzalandıqdan dərhal sonra İrana qarşı hərbi əməliyyatlara başlayıb.
VOA xəbər verir ki, İranın Fars agentliyinin yaydığı açıqlamada Arif bildirib ki, "ABŞ memorandumun mürəkkəbi belə qurumamış İrana hücum etdi". Onun sözlərinə görə, sənədin ilk 60 günü ərzində Hörmüz boğazında gəmi hərəkətinin idarə olunması məsuliyyəti İrana həvalə edilmişdi.
Arif iddia edib ki, Vaşinqton bu razılaşmaya əməl etməyərək hərbi əməliyyatlara başlayıb və bununla da əldə olunmuş razılaşmanı pozub. O, ABŞ-ın addımlarını regionda gərginliyin yenidən artmasının əsas səbəbi kimi qiymətləndirib.
ABŞ və İran son həftələr qarşılıqlı şəkildə memorandumun şərtlərinin pozulması ilə bağlı bir-birini ittiham edirlər. Mübahisənin əsas mövzularından biri sənədin 5-ci maddəsidir. Həmin maddə Hörmüz boğazından keçən kommersiya gəmilərinin təhlükəsiz və maneəsiz hərəkətini nəzərdə tutur. Hər iki tərəf qarşı tərəfin bu öhdəliyi pozduğunu bildirir.
Son günlər Hörmüz boğazında gəmiçilik təhlükəsizliyi ətrafında gərginlik daha da artıb. ABŞ və İran arasında qarşılıqlı hərbi zərbələr davam edir, tərəflər isə dəniz nəqliyyatı və boğaza nəzarətlə bağlı bir-birini beynəlxalq öhdəlikləri pozmaqda günahlandırırlar.
