BAKI,VOA, Fərid Mikayılov
İran parlamentinin sədri Məhəmməd Baqir Qalibaf ABŞ-ın Yaxın Şərqə yeni hərbi texnika və avadanlıqlar göndərməsinin Vaşinqtonun müharibənin başa çatmasını istədiyi barədə bəyanatları ilə ziddiyyət təşkil etdiyini bildirib.
VOA xəbər verir ki, Qalibaf sosial media hesabında etdiyi paylaşımda ABŞ-ın bəyanatları ilə real addımları arasında uyğunsuzluq olduğunu iddia edib.
“ABŞ bölgəyə yeni hərbi texnikalar gətirməyə davam edir və eyni zamanda müharibənin sona çatmasını istədiyini bildirir. Biz ABŞ-ın bu oyunlarını anlamaqda kifayət qədər təcrübə qazanmışıq və buna uyğun hazırlaşmışıq”, – deyə İran parlamentinin sədri qeyd edib.
Qalibaf vurğulayıb ki, dövlətlərin açıqlamaları onların praktiki addımları ilə uyğun olmalıdır. Onun sözlərinə görə, əməllər bəyanatları dəstəkləməli, onlarla ziddiyyət təşkil etməməlidir.
İran rəsmisinin açıqlaması ABŞ və İran arasında Yaxın Şərqdə artan gərginlik fonunda səslənib. Vaşinqton və Tehran arasında qarşılıqlı ittihamlar davam edir.
ABŞ tərəfi İranla bağlı siyasətinin regional təhlükəsizlik və sabitliyin təmin edilməsinə yönəldiyini bildirir.
