BAKI,VOA,Yusif Şərifzadə

İran Xarici İşlər naziri Abbas Əraqçi Fransa diplomatlarının Tehrandakı fəaliyyətini tənqid edib. O, iki fransız diplomatın hərəkətlərini “qeyri-adi və qeyri-peşəkar” adlandıraraq qəbuledilməz hesab edib.

VOA xəbər verir ki, Abbas Əraqçi Fransa Xarici İşlər naziri Jan-Noel Barro ilə telefon danışığı zamanı Tehranda fəaliyyət göstərən iki fransız diplomatın davranışlarına etiraz etdiyini bildirib.

İran Xarici İşlər nazirinin “Telegram” kanalında yayımlanan məlumata görə, Əraqçi diplomatların hərəkətlərini “qeyri-ənənəvi və diplomatik normalara uyğun olmayan” addımlar kimi qiymətləndirib.

İran rəsmisi konkret olaraq hansı hərəkətlərin nəzərdə tutulduğunu açıqlamayıb. O bildirib ki, xarici diplomatik nümayəndəliklərin fəaliyyətinin davam etməsi üçün qəbul edən ölkənin qanun və qaydalarına hörmət edilməsi, həmçinin diplomatik prinsiplərə riayət olunması vacibdir.

Fransa Xarici İşlər naziri Jan-Noel Barro isə daha əvvəl bildirib ki, Tehranda iki Fransa səfirliyi əməkdaşı İran təhlükəsizlik qüvvələrinin “çox ciddi təzyiq və qorxutma tədbirinə” məruz qalıb.

Barro qeyd edib ki, diplomatlar bir neçə saat saxlanılıb və sorğu-sual ediliblər. Paris bu hadisəni beynəlxalq hüququn və diplomatik toxunulmazlıq prinsiplərinin pozulması kimi qiymətləndirib.

İran və Fransa arasında yaranan diplomatik gərginlik son dövrdə iki ölkə arasındakı münasibətlərdə yeni böhran nöqtəsi yaradıb.