BAKI,VOA, Fərid Mikayılov
İran Ordusunun sözçüsü briqada generalı Məhəmməd Əkrəminiya ölkə Silahlı Qüvvələrinin istənilən təhlükəyə qarşı tam hazırlıq vəziyyətində olduğunu və döyüş qabiliyyətinin ən yüksək səviyyəyə çatdırıldığını bildirib.
VOA xəbər verir ki, Generalın sözlərinə görə, ordunun əməliyyat hazırlığı zədələnmiş sistemlərin modernləşdirilməsi, yeni hərbi texnikanın silahlanmaya qəbul edilməsi və yerli müdafiə sənayesinin imkanlarından istifadə hesabına davamlı şəkildə gücləndirilir.
O qeyd edib ki, hərbi hissələrə yeni texnikanın verilməsi ordunun döyüş vasitələrinin müasir əməliyyat tələblərinə uyğun yenidən təşkilinə imkan yaradıb.
Əkrəminiya bildirib ki, İran üçün yeni müharibə meydanlarına daxil olmaq mümkün strateji variantlardan biridir və ölkənin digər müdafiə strategiyaları da mövcuddur. Onun sözlərinə görə, həmin strategiyalar uyğun zamanda ictimaiyyətə açıqlanacaq.
General vurğulayıb ki, son illərdə ordunun müdafiə potensialı mövcud sistemlərin yenilənməsi, yeni silah və avadanlıqların istifadəyə verilməsi, daxili istehsal imkanlarının genişləndirilməsi və şəxsi heyətin döyüş ruhunun gücləndirilməsi hesabına artırılıb.
O bildirib ki, xüsusilə müasir dövrdə döyüş qabiliyyətinin mühüm hissəsi zədələnmiş və ya köhnəlmiş sistemlərin bərpasından asılıdır. İran ordusunun mühəndis və texniki potensialı bu istiqamətdə fəal şəkildə çalışır.
Əkrəminiyanın sözlərinə görə, bu proses təkcə texniki yenilənmə deyil, həm də ölkənin çəkindirmə qabiliyyətinin və operativ reaksiya imkanlarının artırılmasına xidmət edən ümumi müdafiə strategiyasının tərkib hissəsidir.
Sözçü hava hücumundan müdafiə sistemlərinin gücləndirilməsinin ordunun əsas prioritetlərindən biri olduğunu da vurğulayıb.
"Regional təhlükəsizlik mühitinin mürəkkəbləşdiyi şəraitdə hava hücumundan müdafiə ölkənin hava məkanının və həyati əhəmiyyət daşıyan infrastrukturun qorunmasında həlledici rol oynayır", – deyə o bildirib.
General həmçinin qeyd edib ki, müasir silahlar mühüm əhəmiyyət daşısa da, ordunun real gücünü müəyyən edən əsas amil şəxsi heyətin peşəkarlığı, intizamı, mənəvi hazırlığı və yüksək motivasiyasıdır.
