BAKI,VOA,Yusif Şərifzadə

ABŞ-nin İrana qarşı yeni iqtisadi sanksiyalar elan etməsindən sonra Tehranın yanacaqdoldurma məntəqələrində uzun avtomobil növbələri yaranıb. Paytaxt sakinlərinin bir hissəsi yeni məhdudiyyətlərin yanacaq təminatına və qiymətlərə təsir göstərə biləcəyindən narahatdır.

VOA xəbər verir ki, Vaşinqton İran üzərində iqtisadi təzyiqi kəskin şəkildə artıracağını açıqladıqdan sonra çərşənbə axşamı Tehran sakinləri yanacaq almaq üçün məntəqələrə üz tutublar.

ABŞ-nin maliyyə naziri Skott Bessent bir gün əvvəl İranın dünya üzrə maliyyə və iqtisadi əlaqələrinin məhdudlaşdırılmasına yönəlmiş yeni tədbirləri açıqlayıb. O bildirib ki, Vaşinqtonun məqsədi İran iqtisadiyyatını dəstəkləyən maliyyə mənbələrini kəsməkdir.

ABŞ-nin yeni məhdudiyyətləri İranın rəqəmsal maliyyə vasitələri, texnologiya, qızıl, hava nəqliyyatı və dəniz daşımaları sahələrini əhatə edir. Bundan başqa, İranın neft gəlirlərinin əldə edilməsinə, silah tədarükünə və kiberfəaliyyətinə yardım göstərməkdə ittiham olunan 60 şəxs, şirkət və gəmi məhdudiyyətlər siyahısına daxil edilib.

Tehranda yaşayan 55 yaşlı daşınmaz əmlak vasitəçisi Mehdi Yəzdian bildirib ki, iqtisadi məhdudiyyətlər əhalinin bütün təbəqələrinin həyatına təsir göstərir. O, hökuməti qiymətlərə nəzarəti gücləndirməyə çağırıb.

İran iqtisadiyyatı müharibədən əvvəl də yüksək inflyasiya ilə üzləşmişdi. Yeni iqtisadi təzyiqlərin qiymət artımını daha da sürətləndirə biləcəyi ilə bağlı əhali arasında narahatlıq yaranıb.

45 yaşlı müəllim Kia Fərahani iqtisadi təzyiqlərin əhali arasında narazılığı yenidən gücləndirə biləcəyini bildirib. Onun fikrincə, qarşıdakı dövrdə əsas təzyiq hərbi deyil, iqtisadi sahədə hiss oluna bilər.

İranın iqtisadiyyat naziri Əli Mədənizadə isə hökumətin yeni məhdudiyyətlərə hazır olduğunu bildirib. Onun sözlərinə görə, Tehran mümkün iqtisadi təsirlərin idarə olunması üçün ikiillik tədbirlər planı hazırlayıb.

Çin də ABŞ-nin yeni məhdudiyyətlərinə qarşı çıxıb və öz hüquq və maraqlarını qorumaq üçün zəruri tədbirlər görəcəyini açıqlayıb. Çin İran neftinin əsas alıcılarından biri hesab olunur.

Tehranda yaşayan iqtisadçı Səid Leylaz isə İranın uzun illər davam edən məhdudiyyətlərə uyğunlaşdığını bildirib. Bununla belə, o, inflyasiya, bank sistemindəki tarazlığın pozulması, korrupsiya və iqtisadi idarəetmə ilə bağlı daxili problemlərin ölkə üçün əsas təhlükələrdən biri olaraq qaldığını vurğulayıb.