BAKI,VOA, Fərid Mikayılov
İran parlamentinin sədri Məhəmməd Baqir Qalibaf ABŞ-nin İranın neft ixracını məhdudlaşdırmaq cəhdlərinə sərt münasibət bildirib. O, İranın neft sata bilməyəcəyi təqdirdə regiondakı digər ölkələrin də neft ixracına imkan verilməyəcəyini bəyan edib.
VOA xəbər verir ki, Qalibaf iyulun 22-də yaydığı açıqlamanı sosial şəbəkədə yenidən paylaşaraq mövqeyinin dəyişmədiyini göstərib.
İran parlamentinin sədri ABŞ-nin Tehran üzərində iqtisadi təzyiqləri və ölkənin neft ixracına mane olmaq cəhdlərini nəzərdə tutaraq müharibənin şərtlərinin aydın olduğunu bildirib.
“Müharibənin tənliyi aydındır: ya hamı, ya heç kim. Bizim neft sata bilmədiyimiz regionda heç kim neft sata bilməyəcək”, – deyə Qalibaf bildirib.
O, İranın enerji və digər mühüm infrastrukturunun təhlükəsizliyi təmin edilməyəcəyi halda regiondakı digər infrastrukturların da təhlükəsiz olmayacağını vurğulayıb.
Qalibaf Hörmüz boğazının təhlükəsizliyini də ABŞ-nin regiondakı hərbi mövcudluğu ilə əlaqələndirib. Onun sözlərinə görə, boğazda təhlükəsizliyin təmin edilməsi üçün ABŞ qüvvələri regiondan çıxmalıdır.
İran rəsmisi Hörmüz boğazında vəziyyətin əvvəlki şəraitə qayıtmayacağını bir daha bəyan edib. Qalibaf avqustun 18-də də boğazın açılmasını ABŞ-nin blokadanı aradan qaldırması və İranın neft ixracına tətbiq edilən məhdudiyyətləri götürməsi ilə əlaqələndirmişdi.
Hörmüz boğazı ilə bağlı gərginlik hazırda da davam edir. İranın Ali Milli Təhlükəsizlik Şurasının katibi Möhsün Rzayi avqustun 27-də boğazın yenidən açılması üçün Tehranın müəyyən şərtlər hazırladığını bildirib.
