BAKI,VOA, Orxan Qədirzadə
22 aprel 2026-cı il tarixində Astanada keçirilən Regional Ekoloji Sammit (RES 2026) çərçivəsində “Mərkəzi Asiyada biomüxtəlifliyin qorunması üzrə regional əməkdaşlıq: qlobal öhdəliklərdən birgə fəaliyyətə” mövzusunda panel sessiyası baş tutub.
VOA xəbər verir ki, açılış nitqi ilə Qazaxıstanın Ekologiya və Təbii Sərvətlər naziri Erlan Nısanbayev, Özbəkistanın Milli Ekologiya və İqlim Dəyişikliyi Komitəsinin sədri Əziz Abduhakimov, Qırğızıstanın Təbii Sərvətlər, Ekologiya və Texniki Nəzarət naziri Akıl Toktobayev, Tacikistanın Ətraf Mühitin Mühafizəsi Komitəsinin sədri Bahodur Şəralizodə və Türkmənistanın Ətraf Mühitin Mühafizəsi naziri Ovezgeldi Qoşcanov çıxış ediblər.
Xüsusi qonaq qismində BMT-nin Baş katibinin müavinləri: UNEP-in icraçı direktoru İnger Andersen və UNDP İnkişaf Proqramının inzibatçı müavini Haolyan Şu yer alıb.
Panel çərçivəsində Qazaxıstan, Qırğızıstan, Tacikistan, Türkmənistan və Özbəkistanın ekologiya nazirlikləri və dövlət komitələrinin rəhbərləri Mərkəzi Asiyada biomüxtəlifliyin qorunması və dayanıqlı idarə olunması sahəsində əməkdaşlığa dair tarixi Regional Bəyannamə imzaladılar.
Paneldə çıxış edən Türk Mədəniyyəti və İrsi Fondunun prezidenti, professor Aktotı Raimkulova təbiətin mühafizəsində türk xalqlarının əsrlər boyu formalaşmış ortaq mədəni irsinin və ənənəvi biliklərinin strateji əhəmiyyətini vurğulayıb. Fondun prezidenti ekoloji təşəbbüslərin qısamüddətli layihələrdən daha sistemli və bütün cəmiyyəti əhatə edən bir formata keçməsinin zəruriliyini bildirib.
Tədbirdə beynəlxalq təşkilatların yüksək səviyyəli nümayəndələri, o cümlədən BMT-nin Biomüxtəliflik üzrə Konvensiyasının (CBD) İcraçı katibi xanım Astrid Şomaker, Nəsli kəsilməkdə olan növlərin beynəlxalq ticarəti haqqında Konvensiyanın (CITES) Baş katibi İvonn İgero, Beynəlxalq Təbiəti Mühafizə İttifaqının (IUCN) Şərqi Avropa və Mərkəzi Asiya üzrə regional direktoru Oliver Avramoski, Yaşıl İqlim Fondunun Şərqi Avropa, Mərkəzi Asiya və Yaxın Şərq departamentinin iqlim investisiyaları üzrə baş koordinatoru Eldana Cumaliyeva və BMT-nin İnkişaf Proqramının Özbəkistandakı daimi nümayəndəsi Akiko Fudzi iştirak edərək, regionda nadir növlərin miqrasiya dəhlizlərinin qorunması və biomüxtəlifliyin mühafizəsi məsələlərini müzakirə ediblər.
