BAKI,VOA,Yusif Şərifzadə
Küveyt Silahlı Qüvvələrinin Baş Qərargah rəisi general Xalid Əl-Şurəyan Səudiyyə Ərəbistanında müdafiə rəsmiləri ilə görüşərək Bab əl-Məndəb boğazında naviqasiya azadlığının qorunması məsələsini müzakirə edib.
VOA xəbər verir ki, görüş Səudiyyə Ərəbistanının Qırmızı dənizdə husilərin hücumlarına qarşı dəniz daşımalarının təhlükəsizliyini təmin etmək məqsədilə yeni çoxtərəfli müdafiə dəniz alyansının yaradılması istiqamətində səylərini davam etdirdiyi vaxta təsadüf edir.
Məlumata görə, qərargahı Ər-Riyadda yerləşəcək alyansın əsas məqsədi Qırmızı dəniz və Bab əl-Məndəb boğazında beynəlxalq gəmiçiliyin təhlükəsizliyini təmin etməkdir.
Bildirilib ki, təşəbbüsə qoşulmaq üçün 50-yə yaxın ölkəyə dəvət göndərilib. Dəvət olunan dövlətlər arasında Küveyt, Qətər, Bəhreyn, Misir və Pakistan da var. ABŞ-ın təşəbbüsdə iştirakı isə alyansın beynəlxalq nüfuzunun artırılması baxımından mühüm amil kimi qiymətləndirilir.
Bu təşəbbüs husilərin iyulun 20-də Səudiyyə Ərəbistanına qarşı "dəniz blokadası" elan etməsindən, həmçinin Səudiyyə Ərəbistanına məxsus neft tankerlərinə raket və pilotsuz uçuş aparatları ilə hücumlar həyata keçirməsindən sonra irəli sürülüb.
Hücumlar nəticəsində Səudiyyə Ərəbistanı neft ixracının bir hissəsini Yanbu limanı vasitəsilə Qırmızı dəniz marşrutuna yönəltmək məcburiyyətində qalıb. Bu marşrutun da husilərin təzyiqi altında olduğu bildirilir.
