Bakı, AzerVoice
Türkiyə Xarici İşlər Naziri Hakan Fidan, Milli Müdafiə Naziri Yaşar Güler və Milli Kəşfiyat Təşkilatının (MİT) rəhbəri İbrahim Kalın Dəməşqə rəsmi səfər edib.
AzerVoice xəbər verir ki, Dəməşqdə Türkiyə Xarici İşlər Naziri Hakan Fidan, Suriya Prezidenti Əhməd əl-Şəraa ilə görüşüb.
Görüşdə Fidan və Şəraa, Suriya Demokratik Qüvvələrinin (SDQ) silahlarını yerə qoyaraq Suriya ordusuna qoşulmaq qərarını qiymətləndirib.
Bununla yanaşı, görüşdə İsrailin Suriyaya qarşı hücumları və işğal cəhdləri ilə bağlı da fikir mübadiləsi aparılıb.
Xatırladaq ki, bundan əvvəl Türkiyə prezidenti Rəcəb Tayyib Ərdoğan qeyd etmişdi ki, Türkiyə Suriyanın birliyini, sabitliyini və ictimai sülhünü hədəf alan hər cür hücumu, terror və təxribat aktlarını pisləyib.
"Bu gərginliyin tez bir zamanda aradan qaldırılması üçün Suriya rəsmilərinə lazımi tövsiyələri veririk. Prezident Şəraanın təmkinli mövqe sərgiləməsini, hüquq çərçivəsindən çıxanların cəzalandırılacağına dair verdiyi mesajları müsbət qarşılayırıq. Şəraa, intiqam hissinə qapılmadan birləşdirici siyasət yürüdür. Suriya xalqının uzun illərdir həsrətini çəkdiyi qalıcı sülh və sabitliyə tez bir zamanda qovuşmasını səmimiyyətlə arzulayırıq",- deyə o vurğulamışdı.
Həmçinin xətırladaq ki, keçən ay Əhməd əl-Şəraanın Ankaraya etdiyi səfəri zamanı, Türkiyənin Suriya ərazisində iki hərbi baza qurması haqqında razılıq əldə edilmişdi.
